مذہبی تعطیلات کے دوران اسرائیلی رکن پارلیمنٹ سمیت ہزاروں یہودی آباد کار مسجد اقصیٰ میں داخل، مذہبی رسومات ادا کیں

جمعہ 18 اپریل 2025 13:41

مقبوضہ بیت المقدس (اُردو پوائنٹ اخبارتازہ ترین - اے پی پی۔ 18 اپریل2025ء) ہزاروں یہودی آباد کار اسرائیلی سکیورٹی اداروں کی مدد سے مذہبی تعطیلات کے دوران مسجد اقصیٰ میں گھس آئے اور یہودی رسومات ادا کیں ۔ العربیہ اردو کے مطابق فلسطینی اتھارٹی کے زیر انتظام بیت المقدس کے گورنریٹ نے بتایاکہ گزشتہ روز ہزاروں یہودی آباد کار اسرائیلی سکیورٹی اداروں کی مدد سے مسجد اقصیٰ میں گھس آئے، اس دوران فلسطینی مسلمانوں کو مسجد میں داخل ہونے سے روک دیا گیا۔

یہودی آبادکاروں کی یہ بہت بڑی تعداد اپنے مذہبی تہوار کی چھٹیوں سے فائدہ اٹھاتے ہوئے مسجد اقصیٰ میں گھسنے کی منصوبہ بندی کر کے آئی تھی۔ بیت المقدس کے گورنریٹ کے مطابق اس موقع پر یہودی آباد کاروں نے یہودی مذہبی رسومات بھی ادا کیں اور باب الرحمہ تک آزادانہ گھومتے رہے۔

(جاری ہے)

اس موقع پر اسرائیل کی انتہا پسند مذہبی پارٹی سے تعلق رکھنے والے رکن پارلیمنٹ زوی سکوٹ نے بھی مذہبی رسومات ادا کیں جبکہ ہزاروں یہودیوں نے مسجداقصی کی مغربی دیوار کے ساتھ مذہبی رسومات ادا کیں ۔

فلسطینی خبر رساں ادارے ’’و فا ‘‘کے مطابق اس دوران اسرائیلی سکیورٹی فورسز نے مسجد اقصیٰ کو گھیرے میں لئے رکھا ، اسرائیلی فورسز یہودی آبادکاروں کی حفاظت اور مسلمانوں کے مسجد میں داخلے میں رکاوٹ پیدا کرنے پر مامور کی گئی تھیں تاکہ فلسطینی مسلمان اس دوران مسجد اقصیٰ میں داخل نہ ہو سکیں جبکہ مسجد اقصیٰ اور اس سے ملحق علاقے ایک فوجی زون میں تبدیل کر دیئے گئے تھے۔

اسرائیلی حکام نے گزشتہ روز یہودی آباد کاروں کو مسجد اقصیٰ میں محفوظ انداز میں پہنچنے کے لئے راستے میں موجودمسجد ابراہیم کو بھی بند کر دیا تھا تاکہ مسلمان اپنے گھروں تک محدود رہیں۔ واضح رہے کہ 12 اپریل سے 20 اپریل کے دوران یہودیوں کی سالانہ مذہبی تعطیلات ہوتی ہیں ۔ یہ 3 ہزار سال پرانے اس واقعے کی خوشی میں تہوار منایا جاتا ہے جب یہودیوں کو مصر سے نکلنے کا موقع ملا تھا۔ اس روز کو یہودی یوم فصح کے نام سے یاد کرتے ہیں۔