پنجاب میں ساڑھے پانچ لاکھ کاشت کاروں کو گندم سپورٹ فنڈ کے تحت 15 ارب روپے فراہم کرنے کی منظوری صوبائی حکومت کا خوش آئند اقدام ہے ، وزیراعظم شہبازشریف

جمعہ 18 اپریل 2025 13:45

اسلام آباد (اُردو پوائنٹ اخبارتازہ ترین - اے پی پی۔ 18 اپریل2025ء) وزیراعظم محمد شہباز شریف نے وزیر اعلیٰ پنجاب مریم نواز کے گندم کے کاشتکاروں کے لئے خصوصی پیکج کو سراہتے ہوئے کہا ہے کہ ساڑھے 5 لاکھ کاشت کاروں کے لئے براہ راست گندم سپورٹ فنڈ کے تحت 15 ارب روپے کے فنڈز کی منظوری انتہائی خوش آئندا قدام ہے ۔ جمعہ کو وزیراعظم آفس کے میڈیا ونگ سے جاری بیان کے مطابق وزیراعظم نے کہاکہ پنجاب میں گندم کے کاشتکاروں کے لئے آبیانہ اور فکس ٹیکس میں بھی چھوٹ کاشتکاروں کے لئے ریلیف ہے ۔

کسانوں کو چار ماہ مفت سٹوریج کی سہولت مہیا کرنے کے اقدام سے گندم کو موسمی اثرات اور کسانوں کو مارکیٹ کے دباؤ سے محفوظ رکھنے میں آسانی ہوگی۔ گندم اور گندم سے تیار شدہ اشیاء کی برآمد میں وفاقی حکومت، حکومت پنجاب کو بھرپور تعاون فراہم کرے گی۔

(جاری ہے)

وزیراعظم نے کہاکہ پاکستان کی خوشحالی کسان کی خوشحالی سے جڑی ہے ۔ پاکستان مسلم لیگ(ن )کا منشور ہے کہ کسان کو اس کی محنت کا پورا پورا معاوضہ ملے ۔

وزیراعظم نے کہاکہ کسانوں کی فلاح و بہبود کے لئے وزیر اعلیٰ پنجاب کے بروقت اقدامات نہ صرف کسانوں بلکہ پوری پاکستانی معیشت کے لئے مفید ثابت ہوں گے۔ وزیراعظم نے کہاکہ گندم کے کاشتکاروں کے لئے اس پیکج کے اعلان پر وزیر اعلیٰ پنجاب اور ان کی ٹیم کو خراج تحسین پیش کرتا ہوں اور مبارکباد دیتا ہوں۔\932