ناردرن بائی پاس پر ٹریلر کھائی میں گرنے سے ڈرائیور ہلاک، دیگر حادثات میں دو جاں بحق

سپرہائی وے ٹول پلازا پر گاڑی کی ٹکر سے 30 سالہ راہ گیر اور لیاقت آباد 10 نمبر پر گاڑی کی ٹکر سے معمر شہری جاں بحق

ہفتہ 19 اپریل 2025 21:45

کراچی(اُردو پوائنٹ اخبارتازہ ترین - این این آئی۔ 19 اپریل2025ء)ناردرن بائی پاس پر ٹریلر کھائی میں گرنے اور دیگر ٹریفک حادثات میں 3 افراد جاں بحق اور ایک زخمی ہوگیا۔تفصیلات کے مطابق گڈاپ سٹی کے علاقے ناردرن بائی پاس اٹک پمپ پیٹرول پمپ کے قریب ٹریلر ڈرائیور سے بے قابو ہو کر الٹ کر کھائی میں جا گرا جس کے نتیجے میں ٹریلر میں سوار ایک شخص جاں بحق اور ایک زخمی ہوگیا، جاں بحق ہونے والے شخص کی لاش اور زخمی کو چھیپا ایمبولینس کے ذریعے عباسی شہید اسپتال منتقل کیا گیا۔

ترجمان چھیپا فاونڈیشن کے مطابق جاں بحق شخص کی شناخت 45 سالہ ریاض اور زخمی کی 30 سالہ مظہر حسین ولد اکرم حسین کے نام سے کی گئی، جاں بحق شخص ٹریلر کا ڈرائیور تھا جب کہ کلینر زخمی ہے، دونوں پنجاب کے رہائشی تھے، پولیس نے ضابطے کی کارروائی کے بعد لاش ورثا کے حوالے کردی۔

(جاری ہے)

گڈاپ سٹی کے علاقے سپرہائی وے ٹول پلازا کے قریب نامعلوم گاڑی کی ٹکر سے 30 سالہ راہ گیر جاں بحق ہوگیا، متوفی کی لاش چھیپا ایمبولینس کے ذریعے عباسی شہید اسپتال منتقل کی گئی۔

پولیس کے مطابق لاش کی شناخت کی کوشش کی جارہی ہے بعدازاں لاش چھیپا سردخانے منتقل کردی گئی۔لیاقت آباد 10 نمبر مین چورنگی پر بے ہنگم ٹریفک میں جمعہ کی شب ساڑھے 9 بجے نامعلوم گاڑی کی ٹکر سے شدید زخمی ہونے والا ضعیف العمر راہگیر ہفتہ کی صبح جناح اسپتال میں دوران علاج زخموں کی تاب نہ لاتے ہوئے جاں بحق ہوگیا۔پولیس کے مطابق جاں بحق شخص کی حالت ایسی نہیں تھی کہ وہ کوئی بیان دے سکے اور نہ ہی اس کے پاس سے ایسی کوئی چیز ملی جس سے اس کی شناخت کی جا سکے، پولیس نے ضابطے کی کارروائی کے بعد لاش شناخت ورثا کے لیے سردخانے منتقل کردی۔