سعودی وزارت اسلامی کے تحت بلقان میں بین الاقوامی مقابلہ حفظِ قرآن،22 ممالک کے 2350 شرکا نے حصہ لیا

پیر 21 اپریل 2025 14:13

جدہ(اُردو پوائنٹ اخبارتازہ ترین - این این آئی۔ 21 اپریل2025ء)سعودی عرب کی وزارت برائے اسلامی امور نے بوسنیا ہرز گوینا میں سعودی سفارت خانے کے مذہبی اتاشی کے ذریعے بلقان میں سب سے بڑے بین الاقوامی حفظ القرآن مقابلے کے ابتدائی کوالیفائرز مکمل کر لیے۔میڈیارپورٹس کے مطابق یہ پروگرام کوسوو کے مذہبی ادارے اسلامی شیخڈم اور البانیہ میں سعودی سفارت خانے کے تعاون سے منعقد کیا گیا ، مقابلے میں 22 ممالک کے 2350 شرکا نے حصہ لیا ان میں کوسوو، البانیہ، بوسنیا اور ہرزگوینا، مونٹی نیگرو، شمالی مقدونیہ، اٹلی، ترکی، یونان، بلغاریہ، جمہوریہ چیک، قبرص، سلووینیا، کروشیا، رومانیہ، سربیا، ایستونیا، بلجیئم، یوکرین، جارجیا، روس، بیلاروس اور سن مارینو شامل ہیں۔

160 شرکا فائنل کے لیے کوالیفائی کر چکے ہیں جو 8 سے 11 مئی تک کوسوو کے دارالحکومت پرسٹینا میں پانچ مختلف کیٹیگریز میں حصہ لیں گے۔

(جاری ہے)

مقابلے میں مجموعی انعامی رقم پانچ لاکھ سعودی ریال رکھی گئی ہے جبکہ اس کے انعقاد پر تقریبا 12 لاکھ سعودی ریال خرچ ہوئے۔کوسوو کے مفتی اعظم اور اسلامی شیخڈم کے سربراہ شیخ نعیم ترناوا نے سعودی عرب کے مسلسل تعاون کا شکریہ ادا کیا۔انہوں نے بلقان بالخصوص کوسو وکے مسلمانوں میں اسلام کی اعتدال پسندی، قرآن کی اقدار اور تعلیمات کو تقویت دینے کیلیے سعودی وزارت کے مختلف پروگراموں کی تعریف کی۔