سرسید یونیورسٹی میں ITE اسٹوڈنٹ چیپٹر ایک اہم سنگِ میل کی نمائندگی کرتا ہے،چانسلر اکبر علی خان

کراچی (اُردو پوائنٹ اخبارتازہ ترین - این این آئی۔ 22 اپریل2025ء)ٹریفک کی روانی اور سڑک کی حفاظت کو یقینی بنانے میں ٹریفک پولیس کا کردار اہم ہے۔ بین الاقوامی ٹرانسپورٹیشن انجینئرزاور ٹریفک پولیس مل کر ایک موثر اور محفوظ ٹرانسپورٹیشن کا نظام تشکیل دے سکتے ہیں۔ یہ بات سرسید یونیورسٹی آف انجینئرنگ اینڈ ٹیکنالوجی کے چانسلر محمد اکبر علی خان نے انسٹی ٹیوٹ آف ٹرانسپورٹیشن انجینئرز کی افتتاحی تقریب سے خطاب کرتے ہوئے کہی۔

۔ تقریب کے مہمان خصوصی چانسلر محمد اکبر علی خان تھے جبکہ مہمانِ اعزازی ڈی آئی جی پیر محمد شاہ اور انجینئر صادق پیرانی تھے۔ چانسلر اکبر علی خان نے کہا کہ ٹرانسپورٹیشن انجینئرز، ٹریفک پولیس کے تعاون سے ایک بہترین ٹریفک نظام قائم کرسکتے ہیں۔

(جاری ہے)

وہ موثر ٹریفک مینجمنٹ کی حکمت عملیوں کو ڈیزائن کرنے اور اسے لاگو کرنے کی صلاحیت رکھتے ہیں۔

جبکہ ٹریفک پولیس اس کے نفاذ اور تعمیل کے بارے اہم معلومات و رہنمائی فراہم کر سکتی ہے۔ یہ شراکت داری ہمارے شہر کے بنیادی ڈھانچے کو نمایاں طور پر بہتر بنا سکتی ہے اور معیشت کو فروغ دے سکتی ہے۔ چانسلر اکبر علی خان نے کہا کہ سرسید یونیورسٹی میں ITE اسٹوڈنٹ چیپٹرکا آغاز ایک اہم سنگ میل کی نمائندگی کرتا ہے۔ یہ اقدام طلبا کو صنعت کے پیشہ ور افراد کے ساتھ جوڑنے، ٹرانسپورٹیشن انجینئرنگ کی تازہ ترین پیشرفت سے باخبر رکھنے اور معاشرے میں مثبت کردار ادا کرنے کے مواقع فراہم کرے گا۔

پروفیسر ڈاکٹر سروش حشمت لودھی نے کہا کہ لوگ بڑی خاموشی سے دوسرے لوگوں کی جگہ لے لیتے ہیں۔کامیاب نسل وہ ہوتی ہے جس میں لوگوں کی جگہ ایسے لوگ لے لیتے ہیں جو ان سے بہتر ہوتے ہیں۔ سب سے پیاری یادیں کبھی کلاس روم کے اندر نہیں ہوتیں، ہمیشہ کلاس روم سے باہر ہوتی ہیں۔ یہ یادیں شخصیت یا انفرادی سوچ کی تشکیل کرتی ہیں۔اس طرح دوستوں کا ایک حلقہ بنتاہے۔

ڈی آئی جی پیر محمد شاہ نے کہا کہ سرسید یونیورسٹی کے طلبا نے ایک ایسا پلیٹ فارم بنانے میں ایک قابل ذکر اقدام کیا جو ٹرانسپورٹیشن انڈسٹری میں مستقبل کے انجینئرز کے لیے جدت اور قیادت کو فروغ دے گا۔ انجینئر صادق پیرانی نے معاشرے میں مثبت تبدیلی پیدا کرنے کی اہمیت پر روشنی ڈالی، جو زندگیوں کو خوشگوار بناتی ہے اور مستقبل کو بامعنی انداز میں تشکیل دیتی ہے۔ قبل ازیں سول انجینئرنگ و آرکیٹکچر کے ڈین، پروفیسر ڈاکٹر میر شبر علی نے خطبہ استقبالیہ پیش کیا۔