ایم ڈی کیٹ امتحان 5 اکتوبر کو ہوگا،فیصل آباد ڈویژن میں طالبات کے لیے 2 ، طلبہ کیلئے ایک امتحانی مرکز قائم

منگل 9 ستمبر 2025 15:00

مکوآنہ(اُردو پوائنٹ اخبارتازہ ترین - این این آئی۔ 09 ستمبر2025ء)پنجاب بھر کے تمام میڈیکل اینڈ ڈینٹل کالجز میں داخلہ کیلئے یونیورسٹی آف ہیلتھ سائنسزلاہور کے زیر اہتمام امتحان(ایم ڈی کیٹ)5 اکتوبربروز اتوار کی صبح منعقد ہوگاجس میں شرکت کرنے والی فیصل آباد ڈویژن کی4 ہزار طالبات کیلئے ڈویژنل پبلک سکول اور ڈویژنل ماڈل کالج فیصل آبادمیں 2 جبکہ طلبہ کیلئے جی سی یونیورسٹی فیصل آبادمیں ایک امتحانی مرکز قائم کیا گیاہے۔

ایم ڈی کیٹ کے انعقاد اورفول پروف انتظامات کے سلسلہ میں ایک اجلاس ڈپٹی کمشنر کیپٹن(ر) ندیم ناصر کی زیر صدارت منعقدہواجس میں یونیورسٹی آف ہیلتھ سائنسز کے نمائندگان نے آن لائن شرکت کی جبکہ ضلعی انتظامیہ اور متعلقہ محکموں کے افسران بھی موجود تھے۔

(جاری ہے)

ڈپٹی کمشنر نے ہدایت کی کہ امتحان کے روزبچوں کے ہمراہ آنے والے والدین کیلئے بیٹھنے کی سایہ دار جگہ، پینے کے صاف پانی، پنکھوں اور کھانے پینے کی سہولیات کو یقینی بنایا جائے نیزامتحانی مراکز میں رہنمائی ڈیسک، صاف ستھرے واش رومز اور دیگر بنیادی سہولیات کی فراہمی بھی انتظامیہ کی اولین ترجیح ہوگی۔

اس موقع پرسکیورٹی کے حوالے سے پولیس کو فول پروف پلان تشکیل دینے اور امتحانی مراکز کے داخلی و خارجی راستوں کی سخت نگرانی کرنے کی ہدایت بھی دی گئی۔ اس کے ساتھ ساتھ ٹریفک کی روانی برقرار رکھنے کیلئے خصوصی ٹریفک پلان اور پارکنگ ایریاز قائم کرنے کا فیصلہ بھی کیا گیا۔ڈپٹی کمشنر نے مزید بتایا کہ ریسکیو 1122 اور محکمہ صحت کی ٹیمیں امتحانی مراکز پر ہمہ وقت موجود رہیں گی جبکہ محکمہ صحت کے موبائل ہیلتھ کلینکس بھی تعینات کئے جائیں گے۔

سول ڈیفنس کے تعاون سے واک تھرو گیٹس نصب ہوں گے اور تربیت یافتہ والنٹیئرز امیدواروں اور والدین کی رہنمائی کیلئے خدمات انجام دیں گے۔ڈپٹی کمشنر فیصل آباد نے اس عزم کا اظہار کیا کہ ضلعی انتظامیہ ایم ڈی کیٹ امتحان کے پرامن اور شفاف انعقاد کیلئے تمام تر وسائل بروئے کار لائے گی تاکہ امیدواروں کو بہترین سہولیات فراہم کی جا سکیں۔