Live Updates

علامہ اقبال اوپن یونیورسٹی کا خصوصی ریلیف پیکج ،میٹرک اور ایف اے پروگرامز کے مجبور طلبہ کی سمسٹر خزاں کی فیس معاف کر دی

منگل 9 ستمبر 2025 16:02

اسلام آباد (اُردو پوائنٹ اخبارتازہ ترین - اے پی پی۔ 09 ستمبر2025ء) علامہ اقبال اوپن یونیورسٹی کے وائس چانسلر پروفیسر ڈاکٹر ناصر محمود نے سیلاب متاثرہ علاقوں میں مقیم طلبہ کے لیے 120 ملین روپے کے خصوصی ریلیف پیکج کی منظوری دے دی ۔ایک بیان میں انہوں نے کہا کہ یونیورسٹی کا مقصد مشکل حالات میں طلبہ کو سہارا دینا ہے تاکہ وہ مالی مشکلات کے باوجود اپنی تعلیم جاری رکھ سکیں۔

انہوں نے اس عزم کا اظہار کیا کہ علامہ اقبال اوپن یونیورسٹی تعلیم کے فروغ اور طلبہ کی بہبود کے لیے ہر ممکن قدم اٹھاتی رہے گی۔ڈائریکٹر سٹوڈنٹس افیئرز سید غلام کاظم علی کے مطابق یونیورسٹی نے میٹرک اور ایف اے پروگرامز کے وہ جاری طلبہ جنہوں نے ابھی تک فیس جمع نہیں کرائی ان کی رواں سمسٹر خزاں 2025ء کی فیس مکمل طور پر معاف کر دی ہے جبکہ گریجویشن اور ایسوسی ایٹ ڈگری پروگرامز کے طلبہ کو فیس میں 50 فیصد رعایت دی جائے گی۔

(جاری ہے)

انہوں نے کہا کہ داخلوں کی تاریخ میں بھی توسیع کرتے ہوئے یہ 15 ستمبر تک بڑھا دی گئی ہے تاکہ متاثرہ طلبہ آسانی کے ساتھ اپنی تعلیمی سرگرمیاں جاری رکھ سکیں۔یہ اقدام نہ صرف سیلاب متاثرہ طلبہ کے تعلیمی مستقبل کو محفوظ بنانے کی جانب ایک اہم قدم ہے بلکہ یہ یونیورسٹی کی انسانیت دوست پالیسی اور قومی ذمہ داری کا بھی مظہر ہے۔