کمپیٹیشن کمیشن جنید جمشید اور یو اینڈ آئی گارمنٹس کے انضمام کی منظوری دے دی

منگل 22 اپریل 2025 23:27

اسلام آباد(اُردو پوائنٹ اخبارتازہ ترین - آن لائن۔ 22 اپریل2025ء) کمپیٹیشن کمیشن آف پاکستان(سی سی پی) نے جنید جمشید (پرائیویٹ) لمیٹڈ کے میسرز یو اینڈ آئی گارمنٹس (پرائیویٹ) لمیٹڈ میں انضمام کی منظوری دے دی ہے۔ کمپٹیشن کمیشن کو انضمام کی درخواست مشترکہ طور پر یو اینڈ آئی اور جے جے پی ایل کی جانب سے جمع کروائی گئی تھی۔دونوں کمپنیوں کے مابین معاہدے کے مطابق میسرز جے جے پی ایل کا مکمل کاروبار شیئر سویپ کے معاہدے کے تحت میسرز یو اینڈ آئی میں ضم کر لیا جائے گا۔

اس ٹرانزیکشن کی تکمیل کے بعد، جے جے پی ایل ایک علیحدہ قانونی حیثیت کے طور پر وجود نہیں رکھے گی اور اس کی تمام کاروباری سرگرمیاں، اثاثے اور واجبات مکمل طور پر یو اینڈ آئی میں ضم ہو جائیں گے۔کمیشن نے انضمام کی درخواست پر مسابقتی تجزیہ کرتے ہوئے قرار دیا کہ شعبے کی متعلقہ مارکیٹس، جن میں تیار شدہ ملبوسات، جوتے، لوازمات، خوشبوئیں، اور کاسمیٹکس شامل ہیں، اس ٹرانزیکشن سے یو اینڈ آئی کو کسی قسم کی غالب پوزیشن حاصل نہیں ہو گی۔

(جاری ہے)

سی سی پی نے مشاہدہ کیا کہ یہ لین دین بنیادی طور پر ایک گروپ کے اندر انضمام ہے کیونکہ یو اینڈ آئی پہلے ہی جے جے پی ایل میں 25 فیصد حصہ رکھتی ہے۔ کمیشن نے قرار دیا کہ مارکیٹ میں کم داخلی رکاوٹیں اور متعدد موجودہ حریفوں کے باعث یہ انضمام مارکیٹ میں مقابلہ کو متاثر نہیں کرے گا۔ کمیشن نے اس انضمام کی منظوری سیکشن 31(d)(i) کمپٹیشن ایکٹ 2010 کے تحت دے دی ہے۔