راولپنڈی پولیس کی کارروائیاں، ڈکیتی ،راہزنی اور چوری کی وارداتوں میں ملوث اشتہاریوں سمیت 12 ملزمان گرفتار

بدھ 23 اپریل 2025 19:03

راولپنڈی (اُردو پوائنٹ اخبارتازہ ترین - اے پی پی۔ 23 اپریل2025ء) سٹی پولیس آفیسر سید خالد ہمدانی کی سربراہی میں راولپنڈی پولیس نے شہر کے مختلف علاقوں میں کارروائیاں کرتے ہوئے ڈکیتی ،راہزنی اور چوری کی وارداتوں میں ملوث اشتہاریوں سمیت 12 ملزمان گرفتار کر لئے۔ پولیس ترجمان کے مطابق چکلالہ پولیس نے کارروائی کرتے ہوئے گھر سے طلائی زیوارت چرانے والی گھریلو ملازمہ ماہین کو گرفتار کرلیا، ملزمہ ماہین سے 15 لاکھ روپے مالیت کے طلائی زیورات برآمد ہوئے، برآمد طلائی زیورات میں 4 چوڑیاں اور 2 انگوٹھیاں شامل ہیں، ملزمہ اہلخانہ کی غیر موجودگی میں زیورات چرا کر فرار ہوگئی تھی۔

تھانہ سٹی پولیس نے کارروائی کرتے ہوئے موٹر سائیکل چوری اور دیگر چوری کی وارداتوں میں ملوث ملزم محمد امین کو گرفتار کرلیا،ملزم سے 5 مسروقہ ایل ای ڈیز،2 مسروقہ موٹر سائیکل اورسپیئرپارٹس کی فروخت سے حاصل ہونے والی رقم 5500 روپے برآمدہوئے۔

(جاری ہے)

صدر واہ پولیس نے کارروائی کرتے ہوئے سٹریٹ کرائم اور موٹر سائیکل چوری کی وارداتوں میں ملوث 4 رکنی گینگ کو گرفتار کرلیا،گرفتار ملزمان میں جہانزیب، نعیم، عمر اور ازران شامل ہیں،ملزمان سے مسروقہ و چھینے گئے 9 موٹر سائیکل اور مسروقہ رقم 35 ہزار روپے برآمدہوئے۔

آر اے بازار پولیس نے کارروائی کرتے ہوئے موٹر سائیکل چوری اور دیگر چوری کی وارداتوں میں ملوث 2 رکنی گینگ کوگرفتارکر لیا، گرفتار ملزمان میں کاشف اور حمزہ شامل ہیں، ملزمان سے 4 مسروقہ موٹر سائیکل،مسروقہ بیٹری اور رقم 11 ہزار روپے برآمدہوئی۔صدر واہ پولیس نے کارروائی کرتے ہوئے رابری کے مقدمہ میں مطلوب اشتہاری مجرم زبیر جبکہ دھوکہ دہی کے مقدمہ میں مطلوب اشتہاری مجرمان علی شیر اور عثمان کو گرفتار کرلیا۔وارث خان پولیس نے کارروائی کرتے ہوئے امانت میں خیانت کے مقدمہ میں مطلوب اشتہاری مجرم راشد اختر کو گرفتار کرلیا، اشتہاری مجرمان راولپنڈی پولیس کو مطلوب تھے۔