آئی پی ایل : معروف کمنٹیٹرز کو تنقیدی تجزیہ پیش کرنا مہنگا پڑ گیا

ہرشا بھوگلے اور سائمن ڈول کو کمنٹری پینل سے ہٹا دیا گیا

ذیشان مہتاب جمعرات 24 اپریل 2025 14:10

آئی پی ایل : معروف کمنٹیٹرز کو تنقیدی تجزیہ پیش کرنا مہنگا پڑ گیا

نئی دہلی (اُردو پوائنٹ اخبار تازہ ترین۔ 24 اپریل 2025ء ) بھارت کے سابق بولنگ آل راؤنڈر عرفان پٹھان کے بعد مزید 2 معروف کمنٹیٹرز کو انڈین پریمئر لیگ (آئی پی ایل) کے کمنٹری پینل سے نکال دیا گیا۔

انڈین پریمئر لیگ (آئی پی ایل) کا 18 واں ایڈیشن جاری ہے تاہم یہ اپنے میچز سے زیادہ متنازع معاملات کی وجہ سے خبروں کا مرکز ہے۔

آئی پی ایل کے آغاز سے قبل عرفان پٹھان کو اچانک کمنٹری پینل سے نکالے جانے اور ٹورنامنٹ کے آغاز کے ساتھ ہی میچ فکسنگ کی بازگشت اور بی سی سی آئی کی وارننگ کے بعد گزشتہ روز ایک فرنچائز پر میچ فکسنگ کا الزام عائد ہو چکا ہے۔

ابھی ان تنازعات کی گرد تھمی نہ تھی کہ بھارتی کرکٹ بورڈ (بی سی سی آئی) نے آئی پی ایل کے رواں سیزن میں ایڈن گارڈنز میں کھیلے جانے والے باقی میچز سے عالمی شہرت یافتہ کمنٹیٹرز ہرشا بھوگلے اور سائمن ڈول کو کمنٹری پینل سے نکال دیا ہے۔

(جاری ہے)

بھارتی میڈیا کے مطابق اس کی وجہ دونوں کمنٹیٹرز کا پچ کیوریٹرز پر تنقید کرنا بنا ہے۔

رپورٹ کے دونوں تجزیہ کاروں نے ایڈن گارڈنز کے پچ کیوریٹرز کے حوالے سے جن خیالات کا اظہار کیا تھا اس پر کرکٹ ایسوسی ایشن بنگال شدید ناراض ہوئی تھی اور اس کے سیکریٹری نریش اوجھا نے بی سی سی آئی سے دونوں کمنٹیٹرز کو کمنٹری پینل سے ہٹانے کی درخواست کی تھی۔

بی سی سی آئی نے اس شکایت پر انہیں ایڈن گارڈنز کولکتہ میں شیڈول آئندہ تمام میچز میں کمنٹری پینل سے خارج کر دیا ہے۔

واضح رہے کہ ایک کرکٹ ویب سائٹ سے گفتگوع میں ہرشا بھوگلے نے کہا کہ اگر کولکتہ نائٹ رائیڈرز گھر پر کھیل رہی ہے تو ان کو وہ ٹریک ملنے چاہیئں جس کے متعلق ٹیم کا خیال ہے کہ ان کے بولرز کے لیے مدد گار ثابت ہوسکتے ہیں۔

سائمن ڈول کا کہنا تھا کہ اگر اجنکیا رہانے کی ٹیم (کولکتہ نائٹ رائیڈرز) کو ایڈن گارڈنز کے کیوریٹرز کی جانب سے سپورٹ نہیں مل رہی تو ان کو نیا ہوم گراؤنڈ ڈھونڈنا چاہیے۔