پہلا ٹیسٹ، جنوبی افریقہ نے 6 وکٹوں کے نقصان پر 216 رنز بنالیے

نعمان علی کی 4 وکٹیں ، ڈی زورزی کی نصف سنچری

ذیشان مہتاب پیر 13 اکتوبر 2025 17:12

پہلا ٹیسٹ، جنوبی افریقہ نے 6 وکٹوں کے نقصان پر 216 رنز بنالیے

لاہور (اردو پوائنٹ تازہ ترین اخبار ۔ 13 اکتوبر 2025ء ) پاکستان اور جنوبی افریقا کے درمیان 2 ٹیسٹ میچز کی سیریز کے پہلے ٹیسٹ کے دوسرے روز کا کھیل اختتام پذیر ہوگیا۔

لاہور کے قذافی اسٹیڈیم میں کھیلے جا رہے میچ میں پاکستان کے خلاف پہلے ٹیسٹ میچ میں جنوبی افریقا نے پاکستان کی پہلی اننگز کے 378 رنزکے جواب میں 6 وکٹوں پر 216 رنز بنالیے۔

جنوبی افریقی کپتان ایڈن مارکرم 45 کے مجموعی اسکور پر 20 رنز بنا کر نعمان علی کی گیند پر وکٹوں کے پیچھے محمد رضوان کے ہاتھوں کیچ آؤٹ ہوئے۔

ان کے بعد 80 کے مجموعی اسکور پر ویان ملڈر بھی نعمان علی کی گیند پر 17 رنز بنا کر محمد رضوان کو کیچ تھما بیٹھے۔

اس کے علاوہ ریان رکلنٹن 71، اسٹبز 8، بریوس صفر اور ویرین 2 رنز بناکر آؤٹ ہوگئے۔

(جاری ہے)

پاکستان کی جانب سے نعمان علی نے 85رنز کے عوض 4 وکٹیں حاصل کیں جبکہ سلمان علی آغا اور ساجد خان نے ایک، ایک کھلاڑی آؤٹ کیا۔

جنوبی افریقا کو پاکستان کی پہلی اننگز کا اسکور پورا کرنے کیلئے مزید 162 رنز درکار ہیں۔

ٹونی ڈی زورزی 81 اور متھوسامے 6 رنز کے ساتھ ناٹ آؤٹ ہیں۔

اس سے قبل پاکستان نے اپنی پہلی نامکمل اننگز کا آغاز 313 رنز 5 کھلاڑی آؤٹ پر کیا تو محمد رضوان 62 اور سلمان علی آغا 52 رنز کے ساتھ وکٹ پر موجود تھے۔

محمد رضوان 362 کے مجموعے پر 75 رنز بنا کر آؤٹ ہوئے جس کے بعد اسی اوور میں نعمان علی اور ساجد خان بھی کھاتا کھولے بغیر پویلین لوٹ گئے، تینوں کھلاڑیوں کو سینوران متھوسامے نے آؤٹ کیا۔

سلمان علی آغا نروس نائنٹیز کا شکار ہوئے اور 93 رنز بنا کر آؤٹ ہوئے جبکہ شاہین شاہ آفریدی 7 رنز بنا کر آؤٹ ہوئے۔

جنوبی افریقا کی جانب سے متھوسامے نے 6 کھلاڑیوں کو آؤٹ کیا جبکہ پرینیلان سبراین نے دو وکٹیں حاصل کی۔ کگیسو ربادا اور سائمن ہارمر نے ایک ایک وکٹ حاصل کی۔