پاکستانی یوٹیوبر اور وی لاگررجب بٹ نے اپنے یوٹیوب چینل کو ڈیلیٹ کرنے کا اعلان کر دیا

لاہور(اردوپوائنٹ اخبار تازہ ترین۔24اپریل 2025) پاکستانی یوٹیوبر اور وی لاگرجب بٹ نے اپنے یوٹیوب چینل کو ڈیلیٹ کرنے کا اعلان کر دیا، یوٹیوب چینل کے حوالے سے فیصلے نے ان کے مداحوں کو حیرانگی میں مبتلا کر دیا، میڈیا رپورٹس کے مطابق یوٹیوبر رجب بٹ نے ایک پوڈ کاسٹ میں شرکت کرتے ہوئے کہا کہ اگر وہ اپنے وی لاگ کے دوران اپنی ذمہ داریوں کو احسن طریقے سے ادا کر پائے تو وہ اپنے یوٹیوب چینل کو جاری رکھیں گے مگر اگر وہ اپنی ذمہ داریوں میں ناکام ہوئے تو وہ اسے ڈیلیٹ کر دیں گے یہ فیصلہ آسان نہیں ہے۔

یوٹیوبر رجب بٹ نے شوکے دوران اپنی زندگی کے مختلف پہلووں، سوشل میڈیا کے حوالے سے اپنے خیالات کا کھل کر اظہار کیا۔مختلف سوالات کا جواب دیتے ہوئے رجب بٹ کا کہنا ہے کہ اگر کسی کو یہ یقین ہو جائے کہ ان سے جتنے پیسے کمائے گئے ہیں ان کو واپس دے کر کیسز حل ہو جائیں گے تو وہ ایسا کرنے کیلئے تیار ہیں۔

(جاری ہے)

رجب بٹ کا یہ بھی کہنا ہے کہ ان کی زندگی میں جتنے مسائل پیدا ہو چکے ہیں ان سب کا سامنا کرتے ہوئے انہیں اپنی ذمہ داریوں کو بہتر طریقے سے نبھانا ہوگا۔

سعودی عرب میں ان کو پاکستان میں کمائے جانے والے پیسوں کا کوئی فائدہ نہیں ہوا اور ان کے مالی حالات نے بھی انہیں پریشان کر دیا ہے۔انہوں نے کہا کہ ان کی دو دو سال پرانی ویڈیوز کو نکال کر ان پر فتویٰ لگائے جا رہے ہیں اور ان میں سے کئی ویڈیوز ڈھائی لاکھ سے زیادہ ٹک ٹاکرز نے بنائی ہیں لیکن صرف ان کو ہی نشانہ بنایا جا رہا ہے یہ سب کچھ انہیں ناحق تکلیف دے رہا ہے اس کی وجہ سے انہیں ملک سے باہر جانا پڑا ہے اور اس وقت وہ اپنی ماں اور بیوی سے دور ہیں۔

یوٹیوبر رجب بٹ نے پروگرام میں گفتگو کے دوران مزید کہا کہ 90 فیصد عوام ان سے پیار کرتی ہے اور ان کو یہ یقین ہے کہ رجب بٹ نے کچھ غلط نہیں کیا۔ پاکستانی یوٹیوبر رجب بٹ ایک بہت بڑے یوٹیوبر ہیں اور ان کا یوٹیوب چینل ساڑھے 6 ملین سبسکرائبرز کا حامل ہے جو روزانہ تین ملین ویوز حاصل کرتا ہے۔رجب بٹ کایوٹیوب چینل نہ صرف ایک تجارتی اور کاروباری لحاظ سے اہم ہے بلکہ ان کے مداحوں کیلئے ایک اہم تفریح کا ذریعہ بھی ہے۔

اب دیکھنا یہ ہوگا کہ رجب بٹ اپنے یوٹیوب چینل کو ڈیلیٹ کرنے کے اپنے فیصلے پر عملدرآمد کرتے ہیں یا نہیں۔ یوٹیوبررجب بٹ کے اس فیصلے سے سوشل میڈیا کی دنیا میں ان کا مستقبل کیا ہوتا ہے۔خیال رہے کہ اس سے قبل یوٹیوبر رجب بٹ کے خلاف توہین مذہب اور سائبر کرائم قوانین کے تحت مقدمہ درج کیا گیا تھا۔بتایا گیا تھا کہ یوٹیوبر رجٹ بٹ نے اپنی ایک ویڈیو میں اپنا نیا پرفیوم 295کے نام سے لانچ کیاتھا۔

بعدازاں پرفیوم کے نام پر سوشل میڈیا پر تنقید کی گئی تھی کیوں کہ اس میں پاکستان پینل کوڈ (پی پی سی) میں توہین مذہب کے قانون کا حوالہ دیا گیا تھا۔شدید تنقید کے بعد رجب بٹ نے سوشل میڈیا اکاونٹس سے یہ ویڈیو ڈیلیٹ کردی تھی۔ مذہبی تنظیم کے ایک رکن نے رجب بٹ کیخلاف مقامی تھانے میں ایف آئی آر درج کروائی تھی ۔