آئی جی پنجاب ڈاکٹر عثمان انور کی زیر صدارت سالانہ ترقیاتی پروگرام بارے جائزہ اجلاس

اے آئی جی ڈویلپمنٹ کی ترقیاتی منصوبوں کی تکمیل کے لیے سپلیمنٹری گرانٹس کے استعمال بارے بریفنگ

جمعرات 24 اپریل 2025 17:50

لاہور(اُردو پوائنٹ اخبارتازہ ترین - این این آئی۔ 24 اپریل2025ء) انسپکٹر جنرل پولیس پنجاب ڈاکٹر کی زیر صدارت سنٹرل پولیس آفس لاہور میں سالانہ ترقیاتی پروگرام بارے جائزہ اجلاس منعقد ہوا۔ اجلاس میں اے آئی جی ڈویلپمنٹ محمد عبداللہ لک نے ترقیاتی منصوبوں کی تکمیل کے لیے سپلیمنٹری گرانٹس کے استعمال بارے بریفنگ دیتے ہوئے بتایا کہ سالانہ ترقیاتی پروگرام کے تحت ایس ڈی پی او آفسز کی تعمیر پر فی کس 5 ملین روپے رکھے گئے ہیں۔

آئی جی پنجاب نے اے ڈی پی کے تحت ڈویلپمنٹ پراجیکٹس کی تکمیل میں بہترین کارکردگی پر ملتان، سرگودھا اور بہاولپور ریجن کو شاباش دیتے ہوئے سپلیمنٹری گرانٹ سے ترقیاتی منصوبوں کو 30 جون تک بہرصورت مکمل کرنے کی ہدایت کی۔ افسران سے خطاب کرتے ہوئے آئی جی پنجاب نے کہا کہ ترقیاتی فنڈز کے مقررہ مدت میں استعمال میں پنجاب پولیس دیگر تمام محکمہ جات میں سرفہرست آئی ہے، چوہنگ، رائے ونڈ، کاہنہ میں سائبان بنیں گے، اگلے سال 220 سائبان مکمل کریں گے۔

(جاری ہے)

انہوں نے مزید کہا کہ پنجاب کی 144 تحصیلوں تک سیف سٹیز منصوبے پہنچائے جائیں گے۔ آئی جی پنجاب نے افسران کو ہدایت کی کہ سمارٹ پولیس سٹیشنز، سیف سٹیز، چیک پوسٹوں کے تعمیراتی کام مقررہ مدت میں مکمل کیے جائیں۔ اجلاس کے دوران تمام آر پی اوز، سی پی اوز، ڈی پی اوز سمیت متعلقہ افسران نے ترقیاتی منصوبوں کو مقررہ مدت میں مکمل کروانے کی یقین دہانی بھی کروائی۔ اجلاس میں ایڈیشنل آئی جی ساؤتھ پنجاب، آر پی اوز، سی پی اوز، ڈی پی اوز، ڈی آئی جی ایڈمن لاہور، ڈی آئی جی آپریشنز لاہور سمیت متعلقہ افسران نے بذریعہ ویڈیو لنک شرکت کی۔