ستھرا پنجاب پروگرام سے ایک لاکھ 13 ہزار ملازمتیں مہیا کی گئیں، لاکھوں بالواسطہ روزگار کے مواقع بھی پیدا ہوئے ‘ ذیشان رفیق

لاہور(اُردو پوائنٹ اخبارتازہ ترین - این این آئی۔ 27 اپریل2025ء)وزیراعلی مریم نواز کی ہدایت پر وزیر بلدیات ذیشان رفیق نے ستھرا پنجاب پروگرام کے کنٹریکٹرز کی کانفرنس کے دوران ان کی سہ ماہی کارکردگی کا جائزہ لیا۔ مقامی ہوٹل میں ہونے والی کنٹریکٹرز کانفرنس میں سیکرٹری لوکل گورنمنٹ شکیل احمد میاں، ایڈیشنل سیکرٹری احمر کیفی اور تمام ویسٹ مینجمنٹ کمپنیوں کے سی ای اوز نے بھی شرکت کی۔

اس موقع پر ستھرا پنجاب کے اہداف اور درپیش چیلنجز پر تفصیلی تبادلہ خیال کیا گیا۔ کانفرنس کے شرکا ء سے خطاب کرتے ہوئے وزیر بلدیات ذیشان رفیق نے کہا کہ ستھرا پنجاب پروگرام کے آغاز کو تین ماہ کا عرصہ گزر چکا ہے۔ تمام کنٹریکٹرز کو کارکردگی کا سہ ماہی جائزہ لینے کے لئے لاہور بلانے کا مقصد عوام کے لئے صفائی کی معیاری خدمات کی فراہمی ہر صورت میں یقینی بنانا ہے۔

(جاری ہے)

میرے لئے فخر کی بات ہے کہ وزیراعلی مریم نواز شریف کا ستھرا پنجاب ویژن آج عملی شکل میں پورے صوبے میں موجود ہے۔ ذیشان رفیق نے کہا کہ یہ ایک مشکل ٹاسک تھا کیونکہ صفائی کے شعبے میں آئوٹ سورسنگ کا اس سے پہلے کوئی ماڈل پاکستان میں موجود نہیں تھا۔ انہوں نے کہا کہ ستھرا پنجاب پروگرام سے اب تک اندازے سے زیادہ ایک لاکھ 13 ہزار ملازمتیں مہیا کی گئی ہیں۔

براہ راست نوکریوں کے علاوہ لاکھوں بالواسطہ روزگار کے مواقع بھی پیدا ہو رہے ہیں۔ ستھرا پنجاب پروگرام کے تحت صوبہ بھر میں 23 ہزار نئی مقامی مشینری بھی آ چکی ہے۔ وزیر بلدیات نے کہا کہ نئی انڈسٹری وجود میں آنے سے معیشت کو زبردست فروغ ملا تاہم سچ یہ ہے کہ اس انقلابی پروگرام کا اصل مقصد عوام کو صاف ستھرا ماحول فراہم کرنا ہے۔ وزیراعلی مریم نواز شریف نے مختلف اضلاع کے اچانک دورے شروع کر دیے ہیں۔

سیالکوٹ میں وزیراعلی نے گلی محلوں کے اندر جا کر صفائی کے انتظامات کا جائزہ لیا۔ الحمدللہ انہیں ہر جگہ صفائی نظر آئی۔ انہوں نے کنٹریکٹرز پر زور دیا کہ وہ عوام کی خدمت کا یہی جذبہ آگے بھی برقرار رکھیں۔ سستی کی گنجائش پہلے تھی نہ آئندہ ہوگی۔ ذیشان رفیق نے کہا کہ عوام اور وزیراعلی کی توقعات پر پورا اترنا ہمارا نصب العین ہے۔ کنٹریکٹرز کی اپنے ماتحت سٹاف پر گرفت ہونا بہت ضروری ہے۔

ستھرا پنجاب کا پورا پروگرام ڈیجیٹل ہے، کنٹرول روم میں ظاہر ہونے والا ڈیٹا ہی کارکردگی کا پیمانہ ہے لہذا سٹاف کی حاضری اور گاڑیوں کی نقل و حرکت کا ڈیٹا ساتھ ساتھ پورٹل پر اپ لوڈ کریں۔ انہوں نے کہا کہ پنجاب میں صفائی کا نظام پورے ملک کے لئے ماڈل بنانا ہمارا ٹارگٹ ہے۔ شہروں میں زیروویسٹ کا ہدف حاصل کرنے کے بعد 'ستھرا پنجاب' کا دائرہ کار بتدریج ہر گائوں تک پھیلایا جا رہا ہے۔

وزیر بلدیات نے بعض کنٹریکٹرز کی نشاندہی پر بتایا کہ بڑے شہروں کے کمرشل علاقوں میں دو شفٹیں شروع کرنے پر غور کر رہے ہیں۔ انہوں نے ہدایت کی کہ ہیلپ لائن پر موصولہ شکایات کا 24 گھنٹے کے اندر ازالہ کیا جائے۔ سٹاف کو پنجاب حکومت کی طرف سے مقررہ کم سے کم تنخواہ کی ادائیگی پر سمجھوتہ نہیں کریں گے۔ انہوں نے کہا کہ آپریشن پلان پر عملدرآمد کرنا کنٹریکٹر کی ذمہ داری ہے۔

کنٹریکٹرز کانفرنس سے خطاب کرتے ہوئے سیکرٹری لوکل گورنمنٹ شکیل احمد میاں نے کہا کہ کولیکشن پوائنٹس اور ویسٹ انکلوژرز کی تعداد جلد پوری کی جائے۔ اگرچہ اب تک کی کارکردگی تسلی بخش ہے لیکن یہ مزید بہتری کی متقاضی بھی ہے۔ ایچ آر اور مشینری کے اہداف تقریباً پورے کر لئے گئے ہیں۔ نئے نظام کے چیلنجز سے ہم سب نے مل جل کر نمٹنا ہے۔