پاکستان میں استعمال شدہ کمپیوٹر اور پرنٹر سستے ہونے کا امکان

کسٹمز کی قیمتوں میں کمی کا اطلاق لیپ ٹاپ، پرنٹرز اور اس کے پرزوں سمیت استعمال شدہ کمپیوٹرز کی درآمد پر ہوگا

اتوار 27 اپریل 2025 16:05

پاکستان میں استعمال شدہ کمپیوٹر اور پرنٹر سستے ہونے کا امکان

کراچی(اُردو پوائنٹ اخبارتازہ ترین - این این آئی۔ 27 اپریل2025ء)کراچی میں ڈائریکٹوریٹ جنرل آف کسٹمز ویلیو ایشن نے مختلف ممالک سے آنے والے پرانے اور استعمال شدہ کمپیوٹرز، لیپ ٹاپس، پرنٹرز کی درآمد پر کسٹمز ویلیو میں نمایاں کمی کردی ہے۔رپورٹ کے مطابق ڈائریکٹوریٹ نے درآمد کنندگان کی سہولت کے لیے ایک نئی ویلیوایشن رولنگ (2000اور 2025) جاری کی ہے۔

اب تمام ممالک سے آنے والے پرانے اور استعمال شدہ کمپیوٹرز، لیپ ٹاپس، پرنٹرز کی کم کی گئی کسٹمز قیمتیں ان کے پرزوں (Accessories) پر لاگو ہوں گی۔کسٹمز کی قیمتوں میں کمی کا اطلاق لیپ ٹاپ، پرنٹرز اور اس کے پرزوں سمیت پرانے اور استعمال شدہ کمپیوٹرز کی درآمد پر ہوگا۔رولنگ میں انکشاف کیا گیا کہ پچھلی ویلیو ایشن رولنگ ایک سال سے زائد پرانی تھی۔

(جاری ہے)

اس لئے درآمد شدہ ڈیٹا کے تجزیے، موجودہ مارکیٹ کے رجحانات، مارکیٹ قیمتوں اور کسٹمز ویلیوز کے فرق کی بنیاد پر، کسٹمز ایکٹ 1969 کے سیکشن 25 اور 25 اے کے تحت اشیا کی کسٹمز ویلیو کا تعین کرنے کے لئے ایک عمل شروع کیا گیا۔کسٹمز ویلیو کے تعین کے لیے ہونے والی میٹنگ میں متعلقہ اسٹیک ہولڈرز نے شرکت کی۔ انہوں نے اس بات پر زور دیا کہ استعمال شدہ ماڈلز کی قیمتوں میں کمی آئی ہے اور ان کی قیمتوں کا تعین اسی حساب سے کیا جانا چاہیے۔لیپ ٹاپ اور پرنٹرز جیسے استعمال شدہ کمپیوٹر آلات کی کسٹم ویلیو ڈیوٹی اور ٹیکس کا حساب لگانے کے لیے ان کی لین دین کی قیمت کی بنیاد پر طے کی گئی تھی۔