بھارت کی کسی بھی مہم جوئی کا بھرپور جواب دیا جائے گا، اسحاق ڈار

جمعہ 8 مئی 2026 19:01

اسلام آباد(اُردو پوائنٹ اخبارتازہ ترین - آن لائن۔ 08 مئی2026ء) دفاعِ وطن اور عوامی تحفظ کیلئے پاکستان کی سیاسی اور عسکری قیادت کے فولادی عزم کو ایک بار پھر اجاگر کیا گیا ہے۔گزشتہ سال بھارت کی جارحیت کے دوران پاکستان نے بھرپور اور فیصلہ کن جواب دینے سے قبل ہی دشمن کو واضح طور پر خبردار کر دیا تھا۔نائب وزیراعظم اسحاق ڈار نے پاک فوج کے شہریوں کے تحفظ اور ملکی دفاع کے عزم پر مکمل اعتماد کا اظہار کرتے ہوئے کہا کہ بھارت کی جانب سے کسی بھی قسم کی مہم جوئی کا بھرپور طاقت سے جواب دیا جائے گا۔

آٹھ مئی 2025 کو پاک فوج کے ترجمان احمد شریف چوہدری نے بھارتی اشتعال انگیزی کو بے نقاب کرتے ہوئے کہا تھا کہ جنگی جنون میں مبتلا بھارت کے پاکستان میں داخل ہونے والے تمام اسرائیلی ساختہ ڈرونز کو تباہ کر دیا گیا۔

(جاری ہے)

ڈی جی آئی ایس پی آر نے کہا کہ بھارت نے اپنی جارحیت سے پورے خطے کو جنگ کی آگ میں دھکیل دیا، جبکہ انہوں نے واضح کیا کہ جب پاکستان حملہ کرے گا تو بھارتی میڈیا کو بتانے کی ضرورت نہیں پڑے گی بلکہ پوری دنیا خود دیکھے گی۔

پاکستان کی عسکری قیادت نے ہر قیمت پر ملکی سلامتی اور سرحدوں کے تحفظ کو یقینی بنانے کے عزم کا اعادہ کیا ہے۔عالمی ماہرین کے مطابق پاکستان کی بارہا تنبیہ کے باوجود بھارت نے آپریشن سندور کے نام پر جارحیت جاری رکھی جس کے باعث اسے عالمی سطح پر ہزیمت کا سامنا کرنا پڑا۔ماہرین کا کہنا ہے کہ معرکہ حق میں پاکستان کی عسکری خوداعتمادی اور اسٹریٹیجک صلاحیت نے بھارت کو جنگی میدان میں پسپائی پر مجبور کر دیا۔