یو ای ٹی ٹیچنگ سٹاف ایسوسی ایشن کے عہدیداران کی وائس چانسلر ڈاکٹر شاہد منیر سے ملاقات

پیر 28 اپریل 2025 23:21

لاہور (اُردو پوائنٹ اخبارتازہ ترین - این این آئی۔ 28 اپریل2025ء)یو ای ٹی ٹیچنگ سٹاف ایسوسی ایشن نے صدر ڈاکٹرمحمد شعیب کی قیادت میں وائس چانسلر ڈاکٹرشاہد منیر سے ملاقات کی۔ٹی ایس اے نے یونیورسٹی اساتذہ اور ملازمین کی تنخواہوں میں 25فیصد اضافے پر وائس چانسلر کاشکریہ ادا کیااور یونیورسٹی کو مالی بحران سے نکالنے پر انکی کوششوں کو خراج تحسین پیش کیا۔

ملاقات کے دوران ٹی ایس اے قائدین نے وائس چانسلر کیساتھ مکمل یکجہتی اور ساتھ دینے کا اعلان کیااور امید ظاہر کی کہ وائس چانسلر یونیورسٹی کی فلاح و بہبودکیلئے اپنی مخلصانہ کاوشیں جاری رکھیں گے ۔ڈاکٹر شاہد منیر نے یقین دہانی کرائی اگر یونیورسٹی کے مالی حالات بہتر ہوئے تو ملازمین کو انکے بقایا واجبات بھی جلد ادا کردیے جائیں گے۔

(جاری ہے)

ڈاکٹر شاہد منیر نے ٹی ایس اے کے وفد کو بتایا کہ گزشتہ روز ہونیوالی سینڈیکیٹ کے اجلاس میں ٹی ٹی ایس اساتذہ کی ترقی کی منظوری دی گئی،کچھ ملازمین اور اساتذہ کو سروس سے معطل کیا گیا،کچھ ملازمین کے خلاف شوکازنوٹس جاری کرنے کی منظوری دی گئی جبکہ اکیڈمک کونسل کے تمام فیصلوں اور نئے پروگرام کے اجرا کی منظوری بھی دی گئی۔

انہوں نے بتایا کہ سینڈیکیٹ نے کالجز الحاق کمیٹی کے فیصلوں کی منظوری بھی دی۔اسی طرح ریسرچ پراڈکٹویٹی ایوارڈ کے اعلان کی منظوری بھی دے دی گئی،اسکے علاوہ ارکان سینڈیکیٹ نے کیو ایس رینکنگ میں یو ای ٹی کو 205ویں پوزیشن حاصل کرنے پروائس چانسلر اور انکی ٹیم کو سراہا۔اسی طرح ممبر سینڈیکیٹ باقر نجوی کو سپریم کورٹ کے جج کا عہدہ سنبھالنے پر مبارکباد پیش کی اور انکی خدمات کو بھی سراہا۔ وفد میں ڈاکٹر تنویرقاسم ،احمد نوید، ڈاکٹر راشد جلیل، ڈاکٹر عثمان، ڈاکٹر اویس، ڈاکٹر رضوانہ، ڈاکٹر ہدی ، ڈاکٹر شمائلہ ڈاکٹر عرفان جلیس شامل تھے۔