پنجاب حکومت نے گزشتہ ایک سال کے دوران صحافیوں کے لیے تاریخی اقدامات اٹھائے ہیں۔ عظمی بخاری

پیر 28 اپریل 2025 20:40

لاہور (اُردو پوائنٹ اخبارتازہ ترین - اے پی پی۔ 28 اپریل2025ء) وزیر اطلاعات پنجاب عظمی بخاری نے کہا ہے کہ میڈیا ورکرز کے حقوق کا تحفظ اور ان کی آواز بننا وہ اپنی ذاتی ذمہ داری اور مشن سمجھتی ہیں۔ وزیراعلی پنجاب مریم نواز کی حکومت نے گزشتہ ایک سال کے دوران صحافیوں کے لیے تاریخی اقدامات اٹھائے ہیں، اور پنجاب حکومت صحافی برادری کی فلاح و بہبود کے لیے ہر ممکن اقدامات جاری رکھے ہوئے ہے۔

یہ بات انہوں نے وفاقی حکومت کی جانب سے ستارہ امتیاز حاصل کرنے والے صحافیوں اور کالم نگاروں کے اعزاز میں دیئے گئے پروقار عشائیے کے موقع پر گفتگو کرتے ہوئے کہی۔ عشائیے میں سیکرٹری اطلاعات طاہر رضا ہمدانی، ڈی جی پی آر غلام صغیر شاہد سمیت دیگر شخصیات نے شرکت کی۔وزیر اطلاعات نے کہا کہ عوام تک درست اور مستند معلومات کی فراہمی ہی ایک صحافی کی اصل ذمہ داری ہے۔

(جاری ہے)

حقائق پر مبنی صحافت کرنے والے صحافی ہمیشہ سچائی کے علمبردار ہوتے ہیں اور انہیں ایوارڈز ملنا ان کی محنت اور پیشہ ورانہ صلاحیتوں کا حقیقی اعتراف ہے۔انہوں نے اس موقع پر صحافت کے لبادے میں چھپے ان عناصر پر بھی کڑی تنقید کی جو یوٹیوب اور سوشل میڈیا پر جھوٹ، اشتعال انگیزی اور غلط بیانی کو فروغ دیتے ہیں، اور کہا کہ ایسے افراد صحافی کہلانے کے مستحق نہیں۔

عظمی بخاری نے مزید کہا کہ وزیراعلی پنجاب کی خصوصی ہدایت پر صحافیوں کے مسائل کے حل، ان کے تحفظ اور سہولتوں کی فراہمی کے لیے ٹھوس اور تاریخی نوعیت کے اقدامات کیے جا رہے ہیں۔وفاقی حکومت کی جانب سے معروف صحافی اور تجزیہ کار سلمان غنی کو ستارہ امتیاز دیا گیا ہے جبکہ مزمل سہروردی، نصر اللہ ملک، کامران شاہد اور منیب فاروق کو تمغہ امتیاز سے نوازا گیا، جس پر عظمی بخاری نے انہیں خراج تحسین پیش کرتے ہوئے کہا کہ یہ اعزاز نہ صرف ان افراد بلکہ پوری صحافتی برادری کے لیے باعث فخر ہے۔