محکمہ تعلیم بلوچستان کاانٹرمیڈیٹ کے سالانہ امتحانات اور میٹرک کی پیپر مارکنگ کے مکمل بائیکاٹ کا اعلان

کوئٹہ(اُردو پوائنٹ اخبارتازہ ترین - این این آئی۔ 28 اپریل2025ء) محکمہ تعلیم بلوچستان کی ملازمین تنظیموں نے 2مئی سے شروع ہونے والے انٹرمیڈیٹ (ایف ای/ایف ایس سی) کے سالانہ امتحانات 2025 ء اور میٹرک کی پیپر مارکنگ کے مکمل بائیکاٹ کا اعلان کرتے ہوئے کہا ہے کہ بلوچستان بورڈ آف انٹرمیڈیٹ اینڈ سیکنڈری ایجوکیشن کے چیئرمین کی غیرقانونی تعیناتی کے خلاف صوبے بھر میں احتجاجی مظاہرے کئے جائیں گے۔

یہ بات بلوچستان پروفیسرز اینڈ لیکچررزایسوسی ایشن ، آل پاکستان کلرکس ایسوسی ایشن ، گورنمنٹ ٹیچرزایسوسی ایشن،سینئر ایجوکیشنل سٹاف ایسوسی ایشن ، گورنمنٹ ٹیچرز ایسوسی ایشن (آئینی)،وطن ٹیچرز ایسوسی ایشن اور جونیئر ٹیچرز ایسوسی ایشن کے رہنماوں عبدالقدوس کاکڑ، علی اصغر بنگلزئی ، در محمد لانگو، سجاد رند ، عبدالمتین کاکڑ،یوسف کاکڑ اوردیگر نے پیر کو کوئٹہ پریس کلب میںمشترکہ پریس کانفرنس کرتے ہوئے کہی۔

(جاری ہے)

عبدالقدوس کاکڑ نے کہا کہ بلوچستان بورڈ آف انٹرمیڈیٹ اینڈ سیکنڈری ایجوکیشن کے چیئرمین کی غیرقانونی تعیناتی کے خلاف22اپریل سے شروع ہونے والے ایف اے ،ایف ایس سی کے امتحانات اور میٹرک کے پیپرز کی مارکنگ کا بائیکاٹ کیا جس کے بعد اصولاً تو قواعد کے برخلاف ہونے والی تقرری کو واپس لینے کی توقع تھی مگراسکے برخلاف حکومت نے یک جنبش قلم لاکھوں بچوں کے تعلیمی کیرئیر کے ساتھ کھیلتے ہوئے امتحانات ہی ملتوی کردیئے ایک ہفتہ گزرنے کے باوجود ابتک نہ صرف یہ کہ اس غیرآئینی تقرری کو واپس نہیں لیا گیا بلکہ محکمہ تعلیم کی ملازمین تنظیموں کا موقف سنے بغیر2مئی سے امتحانات شروع کرنے کا شیڈول بھی جاری کردیا گیاجس سے حکومت کی غیر سنجیدگی کا اندازہ لگایا جاسکتا ہے۔

انہوں نے کہا کہ 1975ء سے گریڈ19یا 20کا ماہر تعلیم ہی چیئرمین بورڈ آتا رہا ہے مگر اس بار ایک ایسی حکومت جو تعلیمی ایمرجنسی اور گڈگورننس کی دعویدار ہے اس نے اے ای اوز گروپ کے ایک ایسے افسر کوچیئرمین بورڈ تعینات کیاجو اس عہدے کے کوائف اور معیار پر پورا ہی نہیں اترتا ۔انہوں نے کہا کہ بلوچستان ڈیپوٹیشن پالیسی کے تحت ایک بالائی گریڈ پر ڈیپوٹیشن کے تحت تعیناتی کی جاسکتی ہے مگر گڈ گورننس کی دعویدار حکومت نے گریڈ18کے نان کیڈرشخص کو 20گریڈ کی پوسٹ پر چیئرمینبورڈ لاکر بیٹھادیا جو ہمیں کسی صورت قابل قبول نہیں ہے۔

انہوں نے کہا کہ محکمہ تعلیم بلوچستان کی ملازمین تنظیمیں 2مئی سے شروع ہونے والے انٹرمیڈیٹ(ایف اے /ایف ایس سی) کے سالانہ امتحانات2025اور میٹرک کی پیپر مارکنگ کا مکمل بائیکاٹ کا اعلان کرتے ہیں اور جب تک ہمارے مطالبات تسلیم نہیں کئے جاتے ہمارا بائیکاٹ جاری رہے گا۔