یوکرین تنازعہ جاری رہا تو ایٹمی جنگ میں تبدیل ہوسکتا ہے ، امریکا

منگل 29 اپریل 2025 16:04

واشنگٹن (اُردو پوائنٹ اخبارتازہ ترین - اے پی پی۔ 29 اپریل2025ء) امریکی نائب صدر جے ڈی وینس نے خبردار کیا ہے کہ اگر یوکرین جنگ کئی سالوں تک جاری رہی تو یہ تنازعہ ایٹمی جنگ میں تبدیل ہو سکتا ہے۔

(جاری ہے)

العربیہ اردو کے مطابق امریکی بلاگر چارلی کرک کو انٹرویو میں جے ڈی وینس نے کہا کہ بڑے میڈیا ادارے اس خیال کو فروغ دے رہے ہیں کہ اگر یہ جنگ کئی سالوں تک جاری رہی تو روس ٹوٹ جائے گا، یوکرین اپنی زمینیں واپس حاصل کر لے گا اور سب کچھ ویسا ہی ہو جائے گا جیسا جنگ سے پہلے تھا لیکن ان کے یہ اندازے درست نہیں۔

جے ڈی وینس نے خبردار کیا کہ اس جنگ کے جاری رہنے سے سماجی نظاموں کے انہدام اور ایٹمی جنگ جیسے تباہ کن نتائج نکل سکتے ہیں۔انہوں نے یہ بھی واضح کیا کہ امریکی حکومت کی پالیسی اس تنازعے کا خاتمہ ہے، صدر ڈونلڈ ٹرمپ نے اپنی ٹیم کو ہدایت کی ہے کہ وہ تمام دستیاب ذرائع استعمال کرتے ہوئے جنگ ختم کرنے کی کوشش کریں۔دوسری طرف روسی صدر ولادیمیر پیوٹن نےاعلان کیا کہ یوکرین جنگ میں 8 سے 10 مئی تک تین روزہ جنگ بندی کی جائے گی۔