پشاور، خیبر ٹیچنگ ہسپتال میں فالج کے علاج کی جدید سہولت متعارف

تھرومبولائسز کی یہ سہولت صحت کارڈ پلس پروگرام کے تحت فراہم کی جائے گی

منگل 29 اپریل 2025 20:40

پشاور (اُردو پوائنٹ اخبارتازہ ترین - این این آئی۔ 29 اپریل2025ء)خیبر ٹیچنگ ہسپتال نے فالج کے مریضوں کیلئے تھرومبولائسز کے ذریعے بروقت علاج کی سہولت کا باضابطہ اجرا کر دیا۔ہسپتال نے گزشتہ روز فالج کے علاج کے حوالے سے نمایاں سنگ میل عبور کیا جب ایک شدید نوعیت کے سکیمک فالج کے مریض کا کامیاب تھرومبولائسز کے ذریعے علاج کیا گیا، مریض کو انجکشن الٹپلیز دیا گیا جس سے بروقت بہتری آئی۔

تھرومبولائسز کی یہ سہولت اب صحت کارڈ پلس پروگرام کے تحت فراہم کی جائے گی تاکہ مستحق مریضوں کو 24/7فوری علاج کی سہولت حاصل ہو سکے۔ ڈین خیبر میڈیکل کالج پروفیسر ڈاکٹر محمود اورنگزیب نے اس اہم کامیابی پر ٹیم کو مبارکباد دی اور نیورولوجسٹ ڈاکٹر عرفان خٹک کی بروقت تشخیص اور علاج کی تعریف کی۔

(جاری ہے)

انہوں نے بتایا کہ مریض کو بائیں جانب کمزوری کی شکایت کے ساتھ ایک گھنٹے کے اندر اسپتال لایا گیا اور تھرومبولائسز کامیابی سے مکمل ہوئی۔

ڈین کے ایم سی نے کہا کہ یہ کے ٹی ایچ کی تاریخ میں پہلا کامیاب تھرومبولائسز کیس ہے، جو فالج کے علاج میں وقت کی اہمیت، خاص طور پر ابتدائی 3 گھنٹوں کے دوران بروقت علاج کو واضح کرتا ہے۔ہاسپتال ڈائریکٹر ڈاکٹر ظفر آفریدی نے کہا کہ یہ اعزاز ہے کہ کے ٹی ایچ اب ان ہسپتالوں میں شامل ہو گیا ہے جہاں فالج کے جدید علاج کی سہولت دستیاب ہے۔ انہوں نے جلد ایک مخصوص سٹروک یونٹ کے قیام کی مکمل حمایت کا بھی اعلان کیا۔