Live Updates

مشترکہ مفادات کونسل کے اجلاس میں متنازعہ کینال منصوبے کو مسترد ہونا پاکستان کی جیت ہے ، شرجیل انعام میمن

منگل 29 اپریل 2025 23:23

کراچی (اُردو پوائنٹ اخبارتازہ ترین - این این آئی۔ 29 اپریل2025ء) سندھ کے سینئر وزیر شرجیل انعام میمن نے مشترکہ مفادات کونسل کے اجلاس میں متنازعہ کینال منصوبے کو مسترد کیے جانے کے فیصلے کا خیرمقدم کرتے ہوئے اسے پاکستان کی جیت قرار دیا ہے۔ شرجیل انعام میمن نے کہا کہ یہ کسی کی ہار یا جیت نہیں بلکہ پاکستان کی جیت ہے۔ یہ فیصلہ آئین کی بالادستی، قومی یکجہتی اور انصاف کے اصولوں کی فتح ہے۔

" انہوں نے مزید کہا کہ آج ہر پاکستانی کا سر فخر سے بلند ہے کہ ہم نے ایک دوسرے کے حقوق کا اعتراف کیا اور اپنی وحدت کو مزید مضبوط بنایا۔ ایک بیان میں سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا کہ پاکستان پیپلز پارٹی ہمیشہ سے وفاق کی مضبوطی، صوبوں کے حقوق اور عوامی خوشحالی کے لیے کوشاں رہی ہے۔

(جاری ہے)

انہوں نے کہا کہ مشترکہ مفادات کونسل کے فیصلے نے صوبہ سندھ کے عوام کے آبی حقوق کے تحفظ کی جدوجہد کو کامیابی سے ہمکنار کیا ہے۔ شرجیل انعام میمن نے کہا کہ یہ کامیابی سندھ کے عوام کے اجتماعی شعور، چیئرمین بلاول بھٹو زرداری کی مدبرانہ قیادت اور حکومت سندھ کی انتھک محنت کا نتیجہ ہے۔ انہوں نے کہا کہ اگر نئے کینالز کے منصوبے آگے بڑھتے تو سندھ کے کسانوں، مزدوروں اور شہریوں کے لیے پانی کا بحران مزید سنگین ہو جاتا۔

انہوں نے کہا کہ چیئرمین بلاول بھٹو زرداری نے واضح اور غیر لچکدار مقف اپنایا کہ سندھ کا پانی سندھ کے عوام کا ہے اور اس پر کوئی سمجھوتہ ممکن نہیں۔ شرجیل انعام میمن نے متنازعہ آبی منصوبے مسترد ہونے پر پوری قوم، خاص طور پر سندھ کے عوام کو مبارکباد پیش کی اور کہا کہ پاکستان پیپلز پارٹی نے ہمیشہ صوبے کے عوام کے مفادات کو ہر قسم کی سیاسی مصلحتوں سے بالاتر رکھا ہے۔ شرجیل انعام میمن نے کہا کہ آج ایک بار پھر ثابت ہو گیا ہے کہ پیپلز پارٹی ہی وہ قوت ہے جو عملی طور پر عوامی امنگوں کی ترجمان ہے۔