پاکستان میں پیٹرولیم مصنوعات کے وافر ذخائر، دفاعی ضروریات کیلئے بھی کوئی کمی نہیں، چیئرمین اوگرا

پیٹرولیم مصنوعات کی قیمتوں کا بینچ مارک پی ایس او سے لیا جاتا ہے، قائمہ کمیٹی برائے پیٹرولیم کو بریفنگ

منگل 29 اپریل 2025 21:20

اسلام آباد (اُردو پوائنٹ اخبارتازہ ترین - این این آئی۔ 29 اپریل2025ء)چیئرمین اوگرا مسرور خان نے بتایاہے کہ ملک میں پیٹرولیم مصنوعات کے وافر ذخائر موجود ہیں ،دفاعی ضروریات کیلئے بھی کسی قسم کی کمی نہیں ہے۔سید مصطفی محمود کی زیر صدارت قائمہ کمیٹی اجلاس میں پیٹرولیم مصنوعات کے معیار اور پیٹرولیم ڈیلرز ایسوسی ایشن کی تجاویز کا جائزہ لیا گیا۔

وزیر پیٹرولیم علی پرویز ملک نے بتایا کہ پیٹرولیم اور گیس سیکٹر کو پائیدار بنیادوں پر چلانے کے لیے اقدامات کیے جا رہے ہیں اور انہوں نے انکشاف کیا کہ گیس کے استعمال میں کمی کے باعث کچھ گیس فیلڈز کو بند کیا جا رہا ہے جبکہ گیس سیکٹر کے لیے ایک نیا جامع پلان تیار کیا جا رہا ہے۔چیئرمین اوگرا نے بتایا کہ پیٹرولیم مصنوعات کی قیمتوں کا بینچ مارک پی ایس او سے لیا جاتا ہے اور پورے ملک میں یکساں ریٹ یقینی بنانے کے لیے فریٹ مارجن عائد کیا جاتا ہے۔

(جاری ہے)

کمیٹی رکن نوید قمر نے فریٹ مارجن کے غلط استعمال پر تحفظات کا اظہار کرتے ہوئے اس پرانے طریقہ کار پر نظرثانی کا مطالبہ کیا۔مسرور خان نے بتایا کہ آئل سیکٹر میں آئی ٹی کے استعمال پر کام جاری ہے۔آئل مارکیٹنگ کمپنیوں کے نمائندوں نے بریفنگ میں کہا کہ انہوں نے مارجن میں 2روپے 2پیسے اضافے کی تجویز دی تھی لیکن اوگرا نے 1روپے 40پیسے اضافے کی سفارش کی جس پر تاحال عملدرآمد نہیں ہوا۔