انجینئرنگ یونیورسٹی پشاور میں’’ٹیکنالوجیز اینڈ انفارمیشن سائنسز میں جدت ‘‘کے موضوع پر 2 روزہ بین الاقوامی کانفرنس شروع

پشاور (اُردو پوائنٹ اخبارتازہ ترین - اے پی پی۔ 30 اپریل2025ء) یونیورسٹی آف انجینئر نگ اینڈ ٹیکنالوجی پشاورمیں’’ٹیکنالوجیز اینڈ انفارمیشن سائنسز میں جدت ‘‘کے موضوع پر2 روزہ بین الاقوامی کانفرنس شروع ہو گئی۔ کانفرنس کا اہتمام اوریک، یوای ٹی پشاور نے شعبہ کمپیوٹر سسٹم انجینئرنگ کے تعاون سے کیا ہے۔کانفرنس کا مقصد ماہرین تعلیم، محققین اور پروفیشنلز کے درمیان کمپیوٹنگ ٹیکنالوجیز اور انفارمیشن سائنسز کے شعبہ میں ہونے والی جدید ترین پیشرفت سے آگاہی اور اس کو فروغ دینا ہے۔

کانفرنس کی افتتاحی تقریب کے مہمان خصوصی خیبر پختونخوا کے وزیر برائے اعلیٰ تعلیم ،آرکائیوز و لائبریریز مینا خان آفریدی تھے ۔ انہوں نے اپنے خطاب میں کانفرنس کو خوش آئند قرار دیتے ہوئے شرکا پر زور دیا کہ اس طرح کے مواقع سے بھر پور استفادہ حاصل کرنا چاہیے کیونکہ یہ ایک ایسا پلیٹ فارم ہے جہاں مختلف شعبوں سے وابستہ ماہرین و محققین سے جدید اور بین الاقوامی مارکیٹ کے مطابق کمپیوٹر اور انفامیشن سائنسز کے شعبے میں سیکھنے کا موقع ملتا ہے۔

(جاری ہے)

مارکیٹ اورینڈیڈ مضامین کو نصاب میں شامل کرنا ہماری اولین ترجیح ہے جس پر صوبائی حکومت کام کررہی ہے اور جلد ہی ایسے مضامین نصاب کا حصہ ہوں گے جبکہ ایسے مضامین جو عصری تقاضوں سے متصادم ہیں ان کو ختم کر رہے ہیں۔ انہوں نے کہا کہ خیبر پختونخوا میں ٹیلنٹ کی کوئی کمی نہیں ہے صرف اس کو ابھارنے کی ضرورت ہے۔انہوں نے مزید کہا کہ خیبرپختونخوا کی جامعات کو درپیش چیلنجز سے نمٹنے کے لئے خیبر پختونخوا حکومت دیرپا اقدامات کئے ہیں۔

انہوں نے امید ظاہر کی کہ ہماری منصوبہ بندی کے نتیجے میں سال26۔2025میں جامعات مالی استحکام حاصل کرلیں گے۔ انہوں نے کہا کہ اعلی تعلیم کے فروغ سے ہی ملک کو بحران سے نکالا جاسکتا ہے۔ اعلی تعلیم کے حوالے سے ریشنالائزیشن پالیسی پر عمل پیرا ہیں۔ صوبائی ہائیرایجوکیشن کمیشن کے قیام کے حوالے سے سٹیک ہولڈرز کے ساتھ متواتر رابطے میں ہیں۔امید ہے جامعات میں وائس چانسلرز کی تعیناتی کے چیلنج کوجلد حل کر لیں گے۔

اس سے قبل سینئر ڈین یو ای ٹی پشاور پروفیسر ڈاکٹر رضوان محمد گل نے کہا کہ یہ کانفرس ہمیں کمپیوٹنگ ٹیکنالوجیز اینڈ انفارمیشن سائنسز میں جدت کے حوالے سے بہت کچھ سیکھنے میں مدد دے گا جو تعلیمی تحقیق اور پیشہ ورانہ ترقی کے لیے اہم ثابت ہو گا۔کانفر س میں وائس چانسلر انجینئرنگ یونیورسٹی پروفیسر ڈاکٹر قیصر علی، وائس چانسلر اقرا نیشنل یونیورسٹی پشاور جہانگیر درانی سمیت رجسٹرار یو ای ٹی ڈاکٹر خضر اعظم خان ،سینئر فیکلٹی ممبران اور طلبا کی بڑ ی تعداد نے شر کت کی۔