مزدوروں کے مسائل ہرسطح پر حل کرنے کے لیے کوششوں کی اشد ضرورت ہے، لیاقت شبیر

بدھ 30 اپریل 2025 17:15

مظفرآباد(اُردو پوائنٹ اخبارتازہ ترین - این این آئی۔ 30 اپریل2025ء) امیدوار اسمبلی حلقہ تین لیاقت شبیر نے کہا ہے کہ اسلام، آئین اور بین الاقوامی معیارات کے مطابق مزدوروں کی فلاح وبہبود کیلئے اقدامات نہ کرنے پر حکومت اور اس کے اتحادیوں کو سوچنا چاہیے۔ اسلام کے زریں اصولوں کے مطابق بین الاقوامی معیارات کے مطابق مزدوروں کے حالات بہتر بنائیں، مزدوروں کے مسائل ہر سطح پر حل کرنے کے لیے کوششوں کی اشد ضرورت ہے،ہمیں اپنے محنت کشوں پر فخر ہی.یوم مئی کے حوالے سے اپنے پیغام میں لیاقت شبیر نے کہاکہ اسلام محنت کی عظمت پر مکمل یقین رکھتا ہے، ارشاد نبوی ﷺہے کہ مزدور کی مزدوری اس کا پسینہ خشک ہونے سے قبل دی جائے۔

اس حدیث مبارکہ سے واضح ہوتا ہے کہ اسلام محنت کی اہمیت کو کس قدر اہمیت دیتا ہے۔

(جاری ہے)

انہوں نے کہا کہ یہ دن شکاگو کے ان مزدوروں کی یاد ہے جن کی قربانیاں اب عالمی تحریک بن چکی ہیں، دنیا کی ترقی محنت کشوں کی محنت کا نتیجہ ہے اور مزدوروں کی صحت اور حفاظت کے لیے آئی ایل او کی کوششیں قابل ستائش ہیں۔امیدوار اسمبلی حلقہ تین لیاقت شبیر نے کہا کہ ضرورت اس امر کی ہے کہ دنیا میں مزدوروں کی پہلی منظم تحریک جو 1865 میں سری نگر سے شروع ہوئی اور اس تحریک کو دبانے کے لیے ڈوگرہ فورسز نے کم ازکم 28 مزدوروں کو قتل اور سینکڑوں کو زخمی کیا کو بھی یاد کیا جانا چاہے۔

انہوں نے کہا کہ ڈوگرہ حکمرانوں کے خلاف جدوجہد میں ایک اہم کردار ریشم خانہ کے مزدوروں کی جدوجہد کا بھی تھا ان کو بھی یاد رکھا جانا چاہئے۔ حکومت ایسے تمام طبقات جو بنیادی سہولیات سے محروم ہیں ان کی بہتری کے لیے اقدامات اٹھانے صرف باتوں اور بیان بازی سے پیٹ نہیں بھرتے۔ بنیادی صحت اور محکمہ تعلیم میں اصلاحات سے بھی مزدور طبقہ کو نوازنا ہو گا۔

آزاد کشمیر میں مزدوروں کا استحصال تیزی سے بڑھ رہا ہے، انہوں نے کہا کہ مزدوروں کی کم ازکم اجرت، کام کے سازگار ماحول، ان کی صحت کی سہولیات اور ان کے حقوق کے ثحفظ کے لیے صرف خالی باتیں کی جاتی ہیں، قانونی اور انتظامی اصلاحات وقت کی ضرورت ہیں۔ لیبر قوانین پر سختی سے عملدرآمد کو یقینی بنایا جائے۔انہوں نے کہا کہ رزق حلال کمانے والے اس معاشرہ کے قابل فخر لوگ ہیں اور ان لوگوں کی بدولت پی قومیں ترقی کرتی ہیں۔