پاک‘ بھارت کشیدگی سٹاک ایکسچینج میں مندی کا رجحان

مارکیٹ انڈیکس 3600 پوائنٹس سے زیادہ کی کمی ‘کاروبار کا آغاز منفی ہوا جس کے بعد مسلسل کمی دیکھی گئی.رپورٹ

میاں محمد ندیم بدھ 30 اپریل 2025 15:31

پاک‘ بھارت کشیدگی سٹاک ایکسچینج میں مندی کا رجحان

کراچی(اردوپوائنٹ اخبارتازہ ترین-انٹرنیشنل پریس ایجنسی۔30 اپریل ۔2025 )پاکستان اور بھارت کے درمیان کشیدگی کی وجہ سے سٹاک ایکسچینج میں مندی کا رجحان دیکھا جا رہا ہے اور کاروبار کے دوران مارکیٹ انڈیکس 3600 پوائنٹس سے زیادہ کی کمی کے بعد 111192 پوائنٹس تک گر گیا بدھ کے روز مارکیٹ میں کاروبار کا آغاز منفی انداز میں ہوا اور اس میں مسلسل کمی دیکھی گئی.

(جاری ہے)

مارکیٹ میں سرمایہ کاروں کی جانب سے فروخت کا دباﺅ دیکھا گیا ہے جس میں ادارہ جاتی اور انفرادی دونوں سرمایہ کار شامل ہیں مارکیٹ تجزیہ کار مقبوضہ کشمیر کے علاقے پہلگام میں ہونے والے حملے کے بعد پاکستان اور انڈیا کے درمیان بڑھتی ہوئی کشیدگی کو حصص بازار میں مندی کی وجہ قرار دیتے ہیں تجزیہ کار شہر یار بٹ نے بتایا کہ سٹاک مارکیٹ میں مندی کی وجہ پاکستان اور بھارت کے درمیان کشیدگی اور خطے میں جنگ کے خدشات ہیں.

انہوں نے کہا کہ گذشتہ روز انڈیا کے وزیر اعظم نریندر مودی کی جانب سے اپنی افواج کو کارروائی کی ہدایت کے بعد پاکستان کے وزیر اطلاعات عطااللہ تارڑ کے اس بیان نے کہ انڈیا کی جانب سے اگلے 24 سے 36 گھنٹوں میں حملے کا امکان ہے نے سٹاک مارکیٹ کے کاروبار پر منفی اثر ڈالا ہے. انہوں نے کہاکہ سٹاک مارکیٹ ایسے بیانات کے بارے میں بہت حساس ہوتی ہے اور فوری ردعمل دیتی ہے گذشتہ 24 گھنٹوں میں جو حالات پیدا ہوئے ہیں اس کے بعد جنگ کے خدشات بڑھ گئے ہیں جو مارکیٹ پر منفی اثر ڈال رہے ہیں.