سندھ رینجرز اور پولیس کی مشترکہ کارروائی ،بدنام زمانہ ڈکیت گروہ کے 2ملزمان گرفتار

بدھ 30 اپریل 2025 18:08

کراچی (اُردو پوائنٹ اخبارتازہ ترین - این این آئی۔ 30 اپریل2025ء) پا کستان رینجرز(سندھ)اورپولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے گڈاپ ٹاؤن انصاف ہسپتال روڈ سے دوران اسنیپ چیکنگ بدنام زمانہ ڈکیت گروہ (افغان گروپ)کے 2ملزما ن عامر خان اور امان اللہ عرف سوٹھے کو گرفتار کر لیا۔ ملزمان کے قبضے سی3 عدد 30 بور پسٹل بمعہ ایمونیشن (غیر لائسنس یافتہ)، 3 عدد موبائل فونز، نقدی اور2 عدد چوری شدہ موٹر سائیکلیں برآمد کر لی گئیں۔

ابتدائی تفتیش کے دوران ملزمان نے کراچی کے مختلف علاقوں ایوب گوٹھ، جمالی گوٹھ اور مچھر کالونی میں ڈکیتی، اسٹریٹ کرائم اور موٹر سائیکل چوری کی متعدد وارداتوں میں ملوث ہونے کا انکشاف کیا ہے۔ملزمان نے کراچی کے علاقے تھانہ سائیٹ سپر ہائی وے سے دونوں موٹر سائیکلیں چوری کرنے کا بھی اعتراف کیا ہے۔

(جاری ہے)

اس گروہ کے تین ملزمان پہلے ہی رینجرز کے ہاتھوں گرفتار ہو کر جیل جاچکے ہیں۔

ملزمان عادی مجرم ہیں اور ان کے خلاف مختلف تھانوں میں متعدد ایف آئی آرزدرج ہیں۔ گرفتار ملزمان کو بمعہ اسلحہ و ایمونیشن اور مسروقہ سامان مزید قانونی کاروائی کے لیئے پولیس کے حوالے کر دیا گیاہے۔ عوام سے اپیل ہے کہ ایسے عناصر کے بارے میں اطلاع فوری طور پر قریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے دیں۔ آپ کا نام صیغہ راز میں رکھا جائے گا۔