گ* ڈی آئی جی پی حیدرآباد رینج کی یوم مزدور پر فول سیکیورٹی انتظامات کی ہدایت

بدھ 30 اپریل 2025 20:05

3حیدرآباد(اُردو پوائنٹ اخبارتازہ ترین - آن لائن۔ 30 اپریل2025ء) ڈی آئی جی پی حیدرآباد رینج طارق رازق دھاریجو نے مزدوروں کے عالمی دن (یکم مئی) کے موقع پر ریلیوں اور تقریبات کی فول پروف سیکیورٹی کی فراہمی کیلئے رینج کے ایس ایس پیز کو خصوصی ہدایات جاری کر دیں۔ ڈپٹی انسپکٹر جنرل آف پولیس طارق رازق دھاریجو، حیدرآباد رینج نے یکم مئی (لیبر ڈی) کے موقع پر رینج کے تمام ایس ایس پیز کو خصوصی ہدایات جاری کی ہیں کہ لیبر ڈے کی مناسبت سے منعقدہ تقاریب و ریلیوں کے مقامات پر عوام کی جان و مال کے تحفظ کو ہر صورت یقینی بنانے کیلئے تمام تر وسائل بروئے کار لائے جائیں۔

ڈی آئی جی پی طارق رازق دھاریجو نے مزید ہدایت کی کہ شاپنگ سینٹرز، ملکی و غیر ملکی ریستوران، اہم سرکاری و نیم سرکاری دفاتر، عمارتوں، حساس تنصیبات، مساجد، امام بارگاہوں، مزارات، اقلیتی برادری کی عبادت گاہوں اور رہائشی کالونیوں پر حفاظتی اقدامات کو پولیس کنٹی جنسی پلان کے تحت یقینی بنایا جائے۔

(جاری ہے)

حیدرآباد رینج کے تمام ایس ایس پیز بذات خود حفاظتی انتظامات کی نگرانی کریں، اور ایس ڈی پی اوز و ایس ایچ اوز کو علاقوں میں پیٹرولنگ، رینڈم اسنیپ چیکنگ، پکٹنگ، اور ایڈوانس انٹیلیجنس کلیکشن کو مضبوط بنانے کی ہدایت دی گئی ہے۔

شرپسند و سماج دشمن عناصر پر کڑی نظر رکھنے کیلئے سادہ لباس میں ملبوس پولیس اہلکاروں کی تعیناتی کا خاطر خواہ بندوبست کیا جائے۔ڈی آئی جی پی طارق رازق دھاریجو نے مزید کہا ہے کہ پولیس عوام کی جان و مال کے تحفظ جیسے بنیادی فریضے کو انتہائی جانفشانی، ایمانداری، محنت، لگن اور پیشہ ورانہ تقاضوں کے عین مطابق سرانجام دے اور حیدرآباد رینج کی عوام کو پر امن ماحول فراہم کرے۔مزید برآں، لیبر ڈے کے حوالے سے نکالی جانے والی ریلیوں اور اجتماعات کی لمحہ بہ لمحہ نگرانی کے لیے جدید سہولیات سے آراستہ کنٹرول روم کے قیام کی ہدایت بھی جاری کی گئی ہے۔