Live Updates

میرا کام کارکردگی دکھانا ہے چاہے ٹی ٹوئنٹی ہو، ون ڈے یا ٹیسٹ‘بابراعظم

جمعرات 1 مئی 2025 20:29

لاہور(اُردو پوائنٹ اخبارتازہ ترین - آن لائن۔ 01 مئی2025ء)پاکستان کے بیٹر بابر اعظم نے ٹی 20 کرکٹ ٹیم میں اپنی شمولیت سے متعلق لب کشائی کردی۔پی ایس ایل 10 میں پشاور زلمی کے کپتان بابر اعظم نے پاکستان ٹی 20 ٹیم میں اپنے مستقبل کے بارے میں گفتگو کی، انہیں چیمپئنز ٹرافی 2025 میں مایوس کن کارکردگی پر شدید ردعمل کا سامنا کرنا پڑا۔اس کے بعد بابر اور رضوان کو نیوزی لینڈ سے سیریز میں ٹی 20 اسکواڈ سے باہر کردیا گیا تاہم دونوں کھلاڑی دورہ نیوزی لینڈ میں ون ڈے اسکواڈ کا حصہ تھے۔

پی سی بی کی جانب سے بنگلادیش کے خلاف پانچ ٹی 20 میچوں کی ہوم سیریز کے شیڈول کے اعلان کے بعد ٹی 20 ٹیم میں ان کی جگہ کے بارے میں قیاس آرائیاں جاری ہیں۔تاہم بابر اعظم نے قومی ٹی 20 ٹیم میں اپنی شمولیت کے بارے میں فیصلہ سلیکٹرز پر چھوڑ دیا۔

(جاری ہے)

نجی ٹی وی چینل کو انٹرویو دیتے ہوئے بابر نے کہا کہ‘صرف سلیکٹرز اور کوچز ہی اس کا جواب دے سکتے ہیں کہ وہ میرے ٹی ٹوئنٹی کیریئر کے بارے میں کیا سوچ رہے ہیں۔ میرا کام کارکردگی دکھانا ہے چاہے وہ ٹی ٹوئنٹی ہو، ون ڈے ہو یا ٹیسٹ۔ سلیکشن میرے اختیار میں نہیں ہے’۔انہوں نے کہا کہ جب تک اللہ چاہے گا میں کھیلتا رہوں گا، ہمیں بتایا گیا کہ ہمیں ٹی ٹوئنٹی سے آرام دیا جا رہا ہے، اب دیکھتے ہیں کہ وہ کیا فیصلہ کرتے ہیں۔