پنجاب میں اپنی زمین اپنا گھر منصوبے کے ای پورٹل کا افتتاح

شہری مفت پلاٹ کیلئے آن لائن درخواست دے سکیں گے، منصوبے کے پہلے مرحلے میں پنجاب کے 19 اضلاع میں 23 ہاؤسنگ سکیموں کے تحت 3 مرلے کے 2 ہزار پلاٹس مفت فراہم کیے جائیں گے

ساجد علی ہفتہ 3 مئی 2025 13:05

پنجاب میں اپنی زمین اپنا گھر منصوبے کے ای پورٹل کا افتتاح

لاہور ( اُردو پوائنٹ اخبارتازہ ترین۔ 03 مئی 2025ء ) پنجاب حکومت نے صوبے کے بے گھر افراد کے لیے ’اپنی زمین اپنا گھر‘ منصوبے کے ای پورٹل کا افتتاح کردیا۔ تفصیلات کے مطابق وزیراعلیٰ پنجاب مریم نواز نے بے گھر افراد کے لیے ’اپنی زمین اپنا گھر‘ منصوبے کا باضابطہ افتتاح کیا، افتتاحی تقریب میں وزیراعلیٰ نے بٹن دبا کر منصوبے کے ای پورٹل azag.punjab.gov.pk کا اجراء کیا، جس کے ذریعے شہری مفت پلاٹ کے لیے آن لائن درخواست دے سکیں گے، یہ منصوبہ پنجاب حکومت کے پروگرام ’اپنی چھت اپنا گھر‘ کی توسیع ہے، جس کے تحت اب تک 34 ہزار گھروں کی تعمیر کا عمل شروع ہو چکا اور 2 ہزار گھر مکمل کرلیے گئے ہیں۔

بتایا گیا ہے کہ ’اپنی زمین اپنا گھر‘ منصوبے کے پہلے مرحلے میں پنجاب کے 19 اضلاع میں 23 ہاؤسنگ سکیموں کے تحت 3 مرلے کے 2 ہزار پلاٹس مفت فراہم کیے جائیں گے، پہلے مرحلے میں پلاٹوں کی تقسیم جہلم، پتوکی، ماموں کانجن، لودھراں اور رینالہ خورد میں ہوگی، قرعہ اندازی کے ذریعے منتخب ہونے والے افراد کو گھر کی تعمیر کے لیے آسان شرائط پر قرضے بھی دیئے جائیں گے۔

(جاری ہے)

صوبائی وزیر ہاؤسنگ بلال یاسین نے پروگرام کے حوالے سے بریفنگ دیتے ہوئے بتایا کہ ’اپنی چھت اپنا گھر‘ کے تحت 33 ہزار 500 افراد کو گھروں کی تعمیر کے لیے مجموعی طور پر 36 ارب روپے کے قرض جاری کیے جا چکے ہیں، پنجاب کے عوام وزیراعلیٰ مریم نواز شریف کو اس تاریخی فلاحی اقدام پر بھرپور خراجِ تحسین پیش کر رہے ہیں۔ اس موقع پر وزیراعلیٰ پنجاب نے کہا ہے کہ قرض کی واپسی کے لیے آسان اقساط اور 3 ماہ کا گریس پیریڈ رکھا گیا ہے، قرضوں کی واپسی کا عمل بھی شروع ہو چکا ہے، یہ پروگرام میرے دل کے قریب ہے اور قائد نواز شریف کا خواب ہے کہ ہر بے گھر کو اپنی چھت نصیب ہو، نواز شریف لوگوں کے گھر بنتے دیکھ کر خوش ہوتے ہیں کیوں کہ یہ منصوبے محض تعمیرات نہیں بلکہ ہزاروں خاندانوں کی دعائیں ہیں، ماضی کی حکومتیں دہائیوں میں بھی اتنے گھر نہیں بنا سکیں جتنے گھروں کی بنیاد موجودہ حکومت نے صرف 6 ماہ میں رکھی ہے۔