اسلام آباد میں جرائم کی شرح میں 20 فیصد کمی ہوئی ہے ،ڈپٹی انسپکٹر جنرل آپریشنز اسلام آباد

اسلام آباد (اُردو پوائنٹ اخبارتازہ ترین - اے پی پی۔ 03 مئی2025ء) اسلام آباد پولیس کے ڈپٹی انسپکٹر جنرل آپریشنز محمد جواد طارق نے 2025 کے دوران شہر میں جرائم کی شرح میں 20 فیصد کمی کا سہرا موثر ڈیجیٹلائزیشن، جدید نگرانی اور گشت کی بہتر کارروائیوں کے سر ہے۔ انہوں نے توقع ظاہر کی کہ یہ رجحان جاری رہے گا اور اسلام آباد محفوظ ترین شہروں میں سے ایک بن جائے گا ۔

ہفتہ کو نجی چینل سے خصوصی گفتگو میں ڈی آئی جی نے ڈیجیٹلائزیشن اور گشتی آپریشنز کی کامیابی پر روشنی ڈالتے ہوئے کہا کہ جرائم کی شرح میں 20 فیصد کمی پولیسنگ میں بہتری کی عکاسی کرتی ہے۔ انہوں نے جرائم کے واقعات میں نمایاں کمی کی وجہ موثر حکمت عملی اور قانون نافذ کرنے والے بہتر اقدامات کو قرار دیا اور اس اعتماد کا اظہار کیا کہ یہ رجحان جاری رہے گا جس سے اسلام آباد کو محفوظ ترین شہروں میں سے ایک بنایا جائے گا۔

(جاری ہے)

انہوں نے مزید کہا کہ ورلڈ سیفٹی انڈیکس 2025 کے مطابق اسلام آباد نے لندن، نیویارک اور پیرس جیسے ممتاز دارالحکومتوں کو پیچھے چھوڑتے ہوئے عالمی سطح پر سب سے بہتر 100 محفوظ ترین شہروں میں قابل ذکر درجہ بندی حاصل کی ہے۔ محمد جواد طارق نے شہر کے جامع حفاظتی اقدامات کی وضاحت کرتے ہوئے مختلف علاقوں کے لیے تیار کردہ منصوبوں پر بھی روشنی ڈالی۔

انہوں نے کہا کہ بازاروں میں ڈولفن سکواڈز اور سٹی واچرز تعینات کیے گئے ہیں۔ انہوں نے مزید کہا کہ ٹریل پٹرولنگ ٹیموں کوہائیکرز کی نگرانی اور ان کی حفاظت کے لیے بھی مختص کیا گیا ہے۔ڈی آئی جی نے شہر کی حفاظت کو بڑھانے میں ڈیجیٹلائزیشن کے کردار کو بھی اجاگر کیا۔اسلام آباد کو محفوظ شہر بنانے کے اقدامات میں نمایاں کردار کے حوالہ سے انہوں نے کہا کہ گینگ سے متعلق جرائم کی پیش گوئی اور روک تھام کے لیے جدید جرائم کی پیش گوئی کے ماڈل تیار کیے گئے ہیں۔

ڈی آئی جی نے کہا کہ کثیر جہتی حکمت عملیوں نے شہر کے بہتر حفاظتی ریکارڈ میں اجتماعی طور پر بہتری لائی ہے۔ ڈی آئی جی اسلام آباد نے قانون نافذ کرنے والے اقدامات کی حمایت میں حکومت کے فعال اقدامات کی بھی تعریف کی، شہر میں عوامی تحفظ کو بڑھانے اور جرائم کی شرح کو کم کرنے میں مشترکہ کوششوں کے اہم کردار کو اجاگر کیا۔