لیبیا کشتی حادثہ میں جاں بحق مزید دو پاکستانیوں کی میتیں لاہور پہنچا دی گئیں

اتوار 4 مئی 2025 13:20

لاہور (اُردو پوائنٹ اخبارتازہ ترین - اے پی پی۔ 04 مئی2025ء) لیبیا میں کشتی حادثہ کے نتیجہ میں جاں بحق ہونے والے مزید دو پاکستانیوں کی میتیں ہفتے کی رات لاہور انٹرنیشنل ایئرپورٹ پہنچا دی گئیں،جاں بحق افراد کا تعلق ضلع گوجرانوالہ سے تھا جن کی شناخت سفیان اور ندیم احمد کے ناموں سے ہوئی ہے۔میتیں ایئرپورٹ کے کارگو ڈیپارٹمنٹ میں وصول کی گئیں جہاں وفاقی وزیر مملکت برائے پبلک افیئرز رانا مبشر حسین اور رکن صوبائی اسمبلی پنجاب میاں عمران جاوید نے ان کے اہل خانہ کو میتیں حوالے کیں۔

(جاری ہے)

اس موقع پر مرحومین کے لیے دعا اور لواحقین سے اظہارِ تعزیت کیا گیا۔ میڈیا سے گفتگو کرتے ہوئے رانا مبشر حسین نے کہا کہ حکومت متاثرہ خاندانوں کے دکھ میں برابر کی شریک ہے۔ انہوں نے کشتی حادثے کو افسوسناک سانحہ قرار دیتے ہوئے کہا کہ انسانی جانوں سے کھیلنے والوں کے خلاف سخت قانون سازی کی جا رہی ہے۔وفاقی وزیر نے کہا کہ انسانی سمگلنگ میں ملوث کچھ افراد کو گرفتار کیا جا چکا ہے جبکہ دیگر کی گرفتاری کے لیے کارروائیاں جاری ہیں۔واضح رہے کہ یہ افسوسناک واقعہ 12 اور 13 اپریل کی درمیانی شب لیبیا کے مشرقی ساحل کے قریب پیش آیا تھا، جس میں درجنوں افراد ہلاک یا لاپتہ ہو گئے تھے۔