امریکا میں سیاحتی وین اور پک اپ ٹرک میں خوفناک تصادم، 7 افراد ہلاک

وین میں سوار 6 غیر ملکی افراد اور ٹرک ڈرائیور موقع پر ہی جان کی بازی ہار گئے،حکام

ہفتہ 3 مئی 2025 17:09

واشنگٹن (اُردو پوائنٹ اخبارتازہ ترین - این این آئی۔ 03 مئی2025ء)امریکی ریاست آئڈاہو میں یلو اسٹون نیشنل پارک کے قریب ایک ہولناک ٹریفک حادثے میں سات افراد ہلاک ہو گئے۔میڈیارپورٹس کے مطابق آئڈاہو اسٹیٹ پولیس نے بتایاکہ یہ افسوسناک واقعہ تقریبا 7 بج کر 15 منٹ پر یو ایس ہائی وے 20 پر ہنری لیک کے نزدیک پیش آیا، جہاں ایک سیاحتی وین اور ایک ڈاج ریم پک اپ ٹرک آپس میں ٹکرا گئے۔

پولیس کا کہنا تھاکہ مرسڈیز مسافر وین ایک ٹور وہیکل کے طور پر استعمال ہو رہی تھی، جس میں 14 افراد سوار تھے جبکہ پک اپ ٹرک میں صرف ڈرائیور موجود تھا۔ تصادم کے نتیجے میں وین میں سوار 6 غیر ملکی افراد اور ٹرک ڈرائیور موقع پر ہی جان کی بازی ہار گئے۔حادثے کے بعد دو زخمیوں کو میڈیسن میموریل اسپتال منتقل کیا گیا، جہاں ان کی حالت مستحکم بتائی جاتی ہے۔

(جاری ہے)

اسپتال انتظامیہ کے مطابق تین دیگر زخمیوں کو طبی امداد دے کر فارغ کر دیا گیا، جبکہ دو مریضوں کو مزید علاج کے لیے ایسٹرن آئڈاہو ریجنل میڈیکل سینٹر منتقل کیا گیا ہے۔پولیس کا کہنا تھا کہ حادثے کی وجوہات تاحال معلوم نہیں ہو سکیں اور اس کی تحقیقات جاری ہیں۔ہنری لیک، ویسٹ یلو اسٹون، مونٹانا سے تقریبا 17 میل کے فاصلے پر واقع ہے، جو یلو اسٹون نیشنل پارک کے داخلی راستوں میں سے ایک ہے۔حادثے کے بعد یو ایس ہائی وے 20 کو تقریبا سات گھنٹوں کے لیے بند کر دیا گیا تھا، جسے بعد ازاں دوبارہ کھول دیا گیا۔ پولیس کے مطابق جاں بحق افراد کے نام لواحقین کو اطلاع دینے کے بعد جاری کیے جائیں گے۔