نوشکی آئل ٹینکر حادثے کے جھلسنے والے مزید 5 افراد کراچی میں دم توڑ گئے،جاں بحق افرادکی تعداد8ہوگئی

شدید زخمی 24 افراد کو خصوصی طیارے کے ذریعے کراچی ایئر بیس منتقل کیا گیا تھا، زخمیوں کے علاج معالجے کے اخراجات بلوچستان حکومت ادا کرے گی

ہفتہ 3 مئی 2025 17:15

کراچی(اُردو پوائنٹ اخبارتازہ ترین - این این آئی۔ 03 مئی2025ء)نوشکی آئل ٹینکر حادثے کے جھلسنے والے مزید 5 افراد کراچی میں دم توڑ گئے ہیں۔ریسکیو حکام کے مطابق بلوچستان کے علاقے نوشکی میں آئل ٹینکر میں دھماکے سے جھلسنے کا افسوس ناک واقعہ پیش آیا تھا، جس میں جھلسنے والے مزید پانچ زخمی کراچی کے اسپتال میں دوران علاج دم توڑ گئے، جس کے بعد علاج کے لیے کراچی منتقل کیے گئے زخمیوں میں جاں بحق افراد کی تعداد 8 ہو گئی۔

(جاری ہے)

پانچوں جاں بحق افراد کی میتیں سہراب گوٹھ سرد خانے منتقل کر دی گئی ہیں، ایدھی حکام کے مطابق جن کی شناخت 18 سالہ سلمان، 17 سالہ وزیر، 26 سالہ درمحمد، 25 سالہ عبدالباسط اور مصطفی کے ناموں سے ہوئی ہے۔دو روز قبل بھی طیب شاہ اور جہاں زیب دوران علاج جان بحق ہوئے تھے، شدید زخمی 24 افراد کو خصوصی طیارے کے ذریعے کراچی ایئر بیس منتقل کیا گیا تھا، جہاں سے زخمیوں کو ایدھی ایمبولینسوں کے ذریعے نجی اسپتالوں میں منتقل کیا گیا تھا، ریسکیو حکام کا کہنا ہے کہ واقعے کے 16 زخمی کراچی کے 2 مختلف نجی اسپتالوں میں زیر علاج ہیں۔زخمیوں کی کراچی منتقلی کے دوران ایک زخمی دم توڑ گیا تھا، زخمیوں کے علاج معالجے کے اخراجات بلوچستان حکومت ادا کرے گی۔