امریکی صدر ڈونلڈ ٹرمپ کے اقتدار میں آنے کے بعد یورپ منتقل ہونے والے امریکیوں کی تعداد میں اضافہ

پیر 5 مئی 2025 17:14

نیویارک (اُردو پوائنٹ اخبارتازہ ترین - اے پی پی۔ 05 مئی2025ء) امریکی صدر ڈونلڈ ٹرمپ کے دوسری بار اقتدار میں آنے سے قبل ہی بعض امریکیوں نے ملک چھوڑنے کی تیاری شروع کر دی تھی جبکہ اب یورپ منتقل ہونے والوں کی تعداد میں کافی اضافہ سامنے آیا ہے۔ رائٹرز کی جانب سے شائع ہونے والی ایک رپورٹ جس میں ویزوں اور شہریت سے متعلق ڈیٹا اور دوسرے ممالک میں جا کر بسنے کے لئے مدد دینے والی کمپنیوں حوالہ جات دیئے گئے ہیں ،کے مطابق ڈونلڈ ٹرمپ کے صدر بننے کے بعد ان افراد کی تعداد میں قابل ذکر اضافہ ہوا ہے جو یورپ منتقل ہونا چاہتے ہیں تاہم ملک کی مجموعی آبادی 34 کروڑ کے تناسب سے یہ تعداد بہت زیادہ نہیں ہے۔

آئرش پاسپورٹ کے لیے دی گئی درخواستیں اس وقت دہائی میں سب سے بلند سطح پر ہیں اور سب سے زیادہ درخواستیں رواں سال کے پہلے دو ماہ کے دوران دی گئیں۔

(جاری ہے)

آئرلینڈ کے سرکاری اعداد و شمار کے مطابق جنوری اور فروری کے دوران4300افراد نے وہاں کے پاسپورٹ کے لیے اپلائی کیا جو کہ پچھلے برس کی نسبت 60 فیصد تک زیادہ ہے۔اسی طرح فرانسیسی حکومت کے اعداد و شمار سے پتہ چلتا ہے کہ رواں برس کے پہلے تین ماہ کے دوران وہاں لمبے قیام کے لیے امریکیوں کی جانب سے2383درخواستیں موصول ہوئیں جبکہ پچھلے برس یہ تعداد 1980تھی۔

فرانسیسی حکومت کی جانب سے جنوری سے مارچ کے دوران2178درخواستوں کو منظور کیا گیا جبکہ پچھلے برس یہ تعداد1787تھی۔اسی طرح برطانیہ کے ریکارڈ سے یہ بات سامنے آتی ہے کہ 2024 کے آخری تین مہینوں میں وہاں مستقل قیام کے لیے امریکیوں نے جتنی درخواستیں دیں اتنی پچھلے 20 برس کے دوران کسی سہ ماہی کے دوران سامنے نہیں آئیں۔ یہ تعداد 1708تھی۔