ہمیں اپنی زندگیوں کو قرآنی تعلیمات اور سنت رسول صلی اللہ علیہ وسلم کے مطابق ڈھالنا ہو گا، مولانا طارق جمیل

ہمارے نوجوان اگر نبی کریم صلی اللہ علیہ وسلم کے بتائے ہوئے راستے پر چلیں تو آنے والے کل کے عظیم لیڈر بننے کی صلاحیت رکھتے ہیں

منگل 6 مئی 2025 10:20

ْمکوآنہ (اُردو پوائنٹ اخبارتازہ ترین - این این آئی۔ 06 مئی2025ء)اسلامی اسکالر مولانا طارق جمیل نے دنیا اور آخرت میں کامیابی کے لیے قرآن کی سنہری ہدایت کے مطابق زندگی گزارنے پر زور دیا۔ زرعی یونیورسٹی فیصل آباد کے سینئر ٹیوٹر آفس کے قرات و نعت کلب کے زیراہتمام تقریب میں طلباء سے خطاب کرتے ہوئے انہوں نے کہا کہ ہمیں اپنی زندگیوں کو قرآنی تعلیمات اور سنت رسول صلی اللہ علیہ وسلم کے مطابق ڈھالنا ہو گا تاکہ نہ صرف دنیا بلکہ اخروی کامیابیاں بھی سمیٹی جا سکیں۔

(جاری ہے)

انہوں نے کہا کہ نوجوان نسل سیرت النبی سے روشنی حاصل کرنے کے لئے دانستہ کاوشیں عمل میں لائیں۔ انہوں نے کہا کہ حقیقی کامیابی کا راز حضور اکرم ﷺ کے بتائے ہوئے اصولوں پر عمل پیرا ہونے میں ہے۔ انہوں نے طلباء پر زور دیا کہ وہ نہ صرف دنیاوی ترقی کے لیے علم حاصل کریں بلکہ اپنے اخلاقی اور روحانی کردار کو بھی مضبوط کریں۔ انہوں نے ہمدردی، دیانت، عاجزی اور نظم و ضبط کی اہمیت پر زور دیا۔ انہوں نے کہا کہ ہمارے نوجوان اگر نبی کریم صلی اللہ علیہ وسلم کے بتائے ہوئے راستے پر چلیں تو آنے والے کل کے عظیم لیڈر بننے کی صلاحیت رکھتے ہیں۔ سینئر ٹیوٹر ڈاکٹر شوکت علی نے بھی خطاب کیا۔