اسرائیلی مظالم کیخلاف طلبا کی نگرانی سے انکار، ہارورڈ یونیورسٹی کی اربوں ڈالر کی امداد معطل

ٹرمپ نے فلسطینیوں کی نسل کشی پر اسرائیل کیخلاف احتجاج کرنے والے طلبہ کیخلاف کاروائی کا مطالبہ کیا تھا،رپورٹ

منگل 6 مئی 2025 17:03

واشنگٹن(اُردو پوائنٹ اخبارتازہ ترین - این این آئی۔ 06 مئی2025ء)امریکی صدر ڈونلڈ ٹرمپ کی انتظامیہ نے معروف تعلیمی ادارے ہارورڈ یونیورسٹی کی اربوں ڈالر کی وفاقی امداد روک دی ہے۔غیر ملکی خبر رساں ایجنسی کے مطابق امریکی محکمہ تعلیم نے ہارورڈ یونیورسٹی کو باضابطہ طور پر اطلاع دیتے ہوئے تحقیق اور دیگر امور سے متعلق اربوں ڈالر کی گرانٹس منجمد کر دی ہیں۔

رپورٹ کے مطابق اگر ہارورڈ نے ٹرمپ انتظامیہ کے مطالبات پر عمل نہ کیا تو یہ امداد مستقل طور پر معطل رکھی جائے گی۔

(جاری ہے)

یاد رہے کہ اس سے قبل ٹرمپ انتظامیہ نے مارچ میں اعلان کیا تھا کہ وہ ہارورڈ کے تقریبا 256 ملین ڈالر کے معاہدوں اور 8.7 ارب ڈالر کی گرانٹس کا دوبارہ جائزہ لے رہی ہے۔انتظامیہ کا موقف تھا کہ ہارورڈ نے کیمپس میں یہود مخالف رویے روکنے کے لیے مناسب اقدامات نہیں کیے، جس پر وفاقی امداد روکنے کا فیصلہ کیا گیا۔ٹرمپ انتظامیہ اور ہارورڈ یونیورسٹی کے درمیان کشیدگی اس وقت بڑھ گئی جب یونیورسٹی نے حکومتی دبا کے باوجود دیگر اداروں کے برعکس اپنے انتظامی اور تعلیمی معاملات میں مداخلت تسلیم کرنے سے انکار کر دیا تھا۔