Live Updates

اسٹیٹ بینک نے بنیادی شرح سود میں کمی مارکیٹ توقعات سے زیادہ کی ہے،ایس اینڈ پی گلوبل مارکیٹ انٹلیجنس

امریکا کی جانب سے ٹیرف عائد کیئے جانے کی وجہ عالمی سطح پر غیر یقینی صورتحال میں اسٹیٹ بینک محتاط رویہ اختیار کیئے ہوئے ہے، مقامی سطح پر پیداواری سرگرمیوں میں اضافہ ہورہا ہے، رپورٹ

منگل 6 مئی 2025 21:03

اسٹیٹ بینک نے بنیادی شرح سود میں کمی مارکیٹ توقعات سے زیادہ کی ہے،ایس ..

کراچی(اُردو پوائنٹ اخبارتازہ ترین - این این آئی۔ 06 مئی2025ء)ایس اینڈ پی گلوبل مارکیٹ انٹلیجنس نے کہاہے کہ اسٹیٹ بینک نے بنیادی شرح سود میں کمی مارکیٹ توقعات سے زیادہ کی ہے۔اسٹیٹ بینک نے ایک فیصد کمی کے بعد بنیادی شرح سود 11 فیصد مقرر کی ہے۔اسٹیٹ بینک کی جانب سے بنیادی شرح سود میں کمی پر ریٹنگ ایجنسی ایس اینڈ پی گلوبل مارکیٹ انٹیلیجنس نے تبصرہ کرتے ہوئے کہاہے کہ افراط زرمیں کمی، بیرونی کھاتوں میں بہتری کے بعد اسٹیٹ بینک کے پاس بنیادی شرح میں مذید کمی کی گنجائش ہے سال 2025 کے اختتام تک اسٹیٹ بینک بنیادی شرح سود میں مذید 100 بیسز پوائنٹس کی کمی کرسکتا ہے۔

انہوں نے کہاکہ امریکا کی جانب سے ٹیرف عائد کیئے جانے کی وجہ عالمی سطح پر غیر یقینی صورتحال میں اسٹیٹ بینک محتاط رویہ اختیار کیئے ہوئے ہے۔

(جاری ہے)

مقامی سطح پر پیداواری سرگرمیوں میں اضافہ ہورہا ہے۔ مگر پاکستان کے برآمدی آڈرز میں کمی دیکھی جارہی ہے۔مستقبل قریب میں ایندھن کے مہنگا ہونے کی وجہ سے افراط زر میں اضافہ ہوسکتا ہے۔جون کے اختتام تک اسٹیٹ بینک کے زرمبادلہ ذخائر 14 ارب ڈالر تک پہنچ سکتے ہیں۔

پاکستان کو سالانہ بنیادوں پر قرضوں کی ادائیگی کے لئے 27 ارب ڈالر کی ضرورت ہے۔ انہوں نے کہاکہ پاکستان نے مالی سال 2025 کے لئے 16 ارب ڈالر کی ادائیگیاں کردی ہیں، جبکہ 1.3 سے 1.5 ارب ڈالر کی ادائگیاں باقی ہیں۔دوست ممالک کے رول اوور کے بعد بھی آئندہ مالی سال میں بیرونی ادائیگیوں کے لئے 9 ارب ڈالر اضافی درکار ہونگے۔