Live Updates

سپیکر قومی اسمبلی سردار ایاز صادق کی بھارت کے جانب سے پاکستان پر حملے کی شدید الفاظ میں مذمت

بدھ 7 مئی 2025 03:40

اسلام آباد (اُردو پوائنٹ اخبارتازہ ترین - اے پی پی۔ 07 مئی2025ء) سپیکر قومی اسمبلی سردار ایاز صادق نے بھارت کے جانب سے پاکستان پر حملے کی شدید الفاظ میں مذمت کرتے ہوئے کہا ہے کہ بھارت کا رات کی تاریکی میں پانچ مقامات پر حملہ انتہائی بزدلانہ عمل ہے، بھارت نے سول آبادی پر حملہ کر کے عالمی قوانین کی صریح خلاف ورزی کی ہے، بزدل دشمن کے حملے کا منہ توڑ جواب دیا جائے گا۔

اپنے بیان میں اسپیکر قومی اسمبلی نے پاک افواج کو بھارتی جارحیت کا منہ توڑ جواب دینے پر پاک افواج کو خراج تحسین پیش کیا اور کہا کہ پاکستان کی مسلح افواج بھرپور صلاحیت سے دشمن کی جارحیت کا جواب دے رہی ہے، بھارت نے جارحیت کا آغاز کر کے پاکستان کے صبر کا امتحان لیا ہے، بھارت کو بزدلانہ حملے کا بھیانک انجام بھگتنا پڑے گا۔

(جاری ہے)

سردار ایاز صادق نے کہا کہ پوری قوم افواجِ پاکستان کے ساتھ چٹان کی طرح کھڑی ہے، 24 کروڑ عوام بھارت کے خلاف مسلط کردہ جنگ لڑیں گے۔

انہوں نے کہا کہ پاک فضائیہ نے ہمیشہ دشمن کو دندان شکن جواب دیا ہے، قوم اور افواج کے حوصلے بلند ہیں، دشمن ناکام ہو گا۔ انہوں نے کہا کہ بھارت نے پاکستان کی امن کی خواہش کو کمزوری سمجھا،بھارت کو سخت نتائج کا سامنا کرنا پڑے گا۔پوری قوم افواجِ پاکستان کی کامیابی کے لیے دعا گو ہے۔