آئی جی پنجاب ڈاکٹر عثمان انور کی سول سیکریٹریٹ آمد، انٹرنل سکیورٹی کنٹرول روم کا دورہ

ٌآئی جی پنجاب ڈاکٹر عثمان انور کی چیف سیکرٹری پنجاب زاہد اختر زمان، سینئر افسران سے ملاقات سرحدوں پر بڑھتی ہوئی کشیدگی کے پیش نظر پنجاب پولیس اندرونی سکیورٹی اور لاء اینڈ آرڈر برقرار رکھنے کے لیے پوری طرح تیار ہے، آئی جی پنجاب

بدھ 7 مئی 2025 20:15

لاہور (اُردو پوائنٹ اخبارتازہ ترین - آن لائن۔ 07 مئی2025ء) انسپکٹر جنرل پولیس پنجاب ڈاکٹر عثمان انورنے سول سیکریٹریٹ میں انٹرنل سکیورٹی کنٹرول روم کا دورہ کیا اور چیف سیکرٹری پنجاب زاہد اختر زمان و دیگر سینئر افسران سے ملاقات کی۔آئی جی پنجاب ڈاکٹر عثمان انور نے پنجاب پولیس کی سٹریٹیجک اور لاجسٹکس اقدامات بارے آگاہ کیا۔آئی جی پنجاب نے کہا کہ پنجاب پولیس موجودہ صورتحال میں ہائی الرٹ ہے اور حالیہ سرحدی صورتحال کے پیش نظر صوبہ بھرمیں بین الصوبائی سرحدی پولیس چوکیوں سمیت تمام اہم مقامات کی سکیورٹی بڑھا دی گئی ہے۔

کسی بھی ہنگامی صورتحال میں پنجاب پولیس سکیورٹی اور لا ء اینڈ آرڈر کو یقینی بنائے گی۔ضلعی انتظامیہ، سول ڈیفنس اورریسکیو 1122 سمیت تمام اداروں سے کوارڈینیشن مکمل ہے۔

(جاری ہے)

پنجاب پولیس اندرونی سکیورٹی اور لاء اینڈ آرڈر برقرار رکھنے کے لیے پوری طرح تیار ہے۔تمام آرپی اوز اور ڈی پی اوز کو اس حوالے سے ضروری اقدامات بارے ہدایت جاری کر دی گئی ہیں۔

سکیورٹی کے پیش نظر حساس مقامات، اہم تنصیبات پر نفری کی مناسب تعیناتی، ہیومن ریسورس اور لاجسٹکس کی فراہمی یقینی بنائی گئی ہے ۔ متعلقہ اداروں کی مشاورت سے ممنوعہ اور حساس مقامات کی سکیورٹی یقینی بنائی جا رہی ہے۔کسی بھی لاء اینڈ آرڈر صورتحال کو کنٹرول کرنے کے لیے مناسب تعداد میں اینٹی رائٹ فورس کی تعیناتی یقینی بنائی گئی ہے۔سول ڈیفنس اور متعلقہ ضلعی انتظامیہ کے تعاون سے ایئر ریڈ وارننگ سسٹم کو فعال اور دستیابی یقینی بنائی گئی ہے۔

سول ڈیفنس اتھارٹی کی مشاورت سے رضا کار وارڈن سروس آرگنائزیشن کو الرٹ اور فعال رکھا گیا ہے۔بارڈر ایریاز سے آبادیوں کے انخلا کے لئے ملٹری حکام کو مکمل معاونت فراہم کی جائے گی۔کسی بھی ادارے کو ضرورت کے مطابق پنجاب پولیس کا ٹیلی کمیونیکیشن سسٹم اور آلات کی سہولت فراہم کریں گے۔حکومت پنجاب کی طرف سے دیئے گئے پلان کے تحت تمام ضروری اقدامات مقررہ وقت میں کئے جا چکے ہیں۔ڈاکٹر عثمان انور نے مزید کہا کہ پنجاب پولیس اپنی افواج کے شانہ بشانہ ہے اور دشمن کے سامنے سیسہ پلائی دیوار ہے۔پنجاب پولیس کے جوان متاثرہ مقامات پر امدادی سرگرمیوں میں بڑھ چڑھ کر حصہ لے رہے ہیں۔