سیکرٹری محکمہ تعلیمات کالجز سندھ کا امتحانی مراکز کا دورہ، انتظامی امور کا جائزہ

بدھ 7 مئی 2025 21:50

کراچی (اُردو پوائنٹ اخبارتازہ ترین - اے پی پی۔ 07 مئی2025ء) سیکرٹری محکمہ تعلیمات کالجز سندھ شہاب قمر انصاری نے کراچی میں کالج ایجوکیشن ڈیپارٹمنٹ کے دفاتر اور امتحانی مراکز کا دورہ کیااور انتظامی امور کا جائزہ لیاتاکہ امتحانی عمل کو موثر اور شفاف بنایا جا سکے۔

(جاری ہے)

بدھ کو جاری اعلامیہ کے مطابق انہوں نے اپنا دورہ ڈائریکٹوریٹ جنرل کالجز سندھ سے شروع کیا، جہاں ڈائریکٹر جنرل کالجز سندھ ڈاکٹر نوید الرب صدیقی اور ریجنل ڈائریکٹر کالجز کراچی پروفیسر فقیر محمد لاکہو نے ان کا استقبال کیا اور محکمہ کی جاری علمی اور انتظامی سرگرمیوں پر انہیں بریفنگ بھی دی۔

انہوں نے گورنمنٹ کالج فار ویمن شارعِ لیاقت اور ڈی جے گورنمنٹ سائنس کالج کراچی کے امتحانی مراکز کا بھی دورہ کیا۔ دورہ کے دوران انہوں نے امتحانات میں طلبہ کو سازگار ماحول فراہم کرنے کی اہمیت پر زور دیتے ہوئے متعلقہ اداروں کے پرنسپلز کو ہدایت دی کہ طلبہ کو تمام ضروری سہولیات بروقت اور مکمل طور پر فراہم کی جائیں تاکہ امتحانی عمل میں کسی قسم کی رکاوٹ نہ آئے۔یہ دورہ محکمہ کالج ایجوکیشن کی جانب سے امتحانی نظام میں شفافیت اور معیار کو برقرار رکھنے کے عزم کی عکاسی کرتا ہے۔