کاغان ڈویلپمنٹ اتھارٹی نے دھنو گائوں کی رابطہ سٹرک بحال کر دی

جمعرات 8 مئی 2025 13:41

مانسہرہ (اُردو پوائنٹ اخبارتازہ ترین - اے پی پی۔ 08 مئی2025ء) کاغان ڈویلپمنٹ اتھارٹی( کے ڈی اے) نے لینڈنگ سلائیڈنگ اور کٹائو کی وجہ سے بند ہونے والی گائوں دھنو کی رابطہ سٹرک کو بحال کر دیا۔ کاغان ڈویلپمنٹ اتھارٹی وادی کاغان میں سیاحت کے فروغ کے ساتھ ساتھ وادی کے رہائشیوں کو سہولیات کی فراہمی اور ان کی مشکلات دور کرنے میں بھی پیش پیش ہے۔

(جاری ہے)

وادی کاغان کی یونین کونسل مہانڈری کے گاؤں دھنو کی رابطہ سڑک مختلف مقامات پر بھاری لینڈ سلائیڈنگ اور کٹاؤ کی وجہ سے 4 ماہ سے زائد عرصہ بند رہنے کی وجہ سے یہاں کے رہائشیوں کو شدید مشکلات کا سامنا تھا۔

رکن صوبائی اسمبلی منیر حسین لغمانی کی ہدایات پر کے ڈی اے کے ڈائریکٹر جنرل شبیر خان کے احکامات پر ٹیکنیکل سٹاف نے رابطہ سڑک گاڑی کی آمدورفت کے لئے بحال کر دی۔ علاقہ مکینوں نے کے ڈی اے سٹاف کا شکریہ ادا کرتے ہوئے کہا کہ رابطہ سٹرک بحال ہونے سے ان کو ریلیف ملا ہے۔