سول ڈیفنس کے زیر اہتمام جنگی اور ہنگامی صورتحال سے نمٹنے کے لیے موک ایکسرسائز

جمعرات 8 مئی 2025 20:50

سرگودھا (اُردو پوائنٹ اخبارتازہ ترین - اے پی پی۔ 08 مئی2025ء) ڈپٹی کمشنر کیپٹن (ر) محمد وسیم نے سول ڈیفنس دفترمیں جنگی اور ہنگامی صورتحال سے نمٹنے کے لیے منعقدہ موک ایکسرسائز (فرضی مشق) کا تفصیلی جائزہ لیا۔اس مشق میں ریسکیو 1122، سول ڈیفنس، محکمہ صحت، ضلعی انتظامیہ، پولیس، فائر بریگیڈ اور دیگر متعلقہ اداروں نے بھرپور شرکت کی ۔مشق کا مقصد کسی ممکنہ جنگی، دہشت گردی یا قدرتی آفت کی صورت میں ضلعی سطح پر اداروں کی تیاری، فوری ردعمل، وسائل کی تقسیم، اور باہمی تعاون کا عملی مظاہرہ تھا۔

مشق کے دوران مختلف ہنگامی حالات کو فرض کرتے ہوئے ریسکیو آپریشنز، زخمیوں کو فوری طبی امداد کی فراہمی، شہریوں کی محفوظ مقامات پر منتقلی، آگ بجھانے اور بم ڈسپوزل کے اقدامات کی مشق کی گئی۔

(جاری ہے)

ڈپٹی کمشنر کیپٹن (ر) محمد وسیم نے مشق کے بعد جوانوں اور افسران سے خطاب کرتے ہوئے کہا کہ قوموں کا دفاع صرف فوج کی نہیں بلکہ ہر ادارے اور ہر شہری کی مشترکہ ذمہ داری ہے۔

انہوں نے کہا کہ سول ڈیفنس اور دیگر ادارے فرنٹ لائن پر عوامی خدمت انجام دیتے ہیں، ان کی تربیت اور تیاری جتنی بہتر ہوگی،کسی بھی ناگہانی صورتحال میں نقصان اتنا ہی کم ہو گا۔ انہوں نے مزید کہا کہ جدید تقاضوں کے مطابق ٹریننگ، آلات، اور مشقوں کا تسلسل ضلعی سطح پر انتہائی ضروری ہے۔ ڈپٹی کمشنر نے افسران کو ہدایت دی کہ اسکولز، کالجز اور کمیونٹی لیول پر آگاہی مہمات کو فروغ دیا جائے تاکہ عام شہریوں میں بھی ابتدائی طبی امداد، آگ بجھانے، اور انخلاءکی تربیت ہو۔

اس موقع پر ایڈیشنل ڈپٹی کمشنر جنرل عمر فاروق، سول ڈیفنس آفیسر، ڈسٹرکٹ ایمرجنسی آفیسر ریسکیو 1122، محکمہ صحت و بلدیہ کے نمائندگان اور دیگر افسران بھی موجود تھے۔ ڈپٹی کمشنر نے مشق میں حصہ لینے والے اہلکاروں کی کارکردگی کو سراہا اور ان کے جذبے کو خراج تحسین پیش کیا۔