فلسطینی نائب صدر کی سعودی ولی عہد سے ملاقات، فلسطین کی تازہ ترین صورت حال پر تبادلہ خیال

جمعہ 9 مئی 2025 08:40

ریاض (اُردو پوائنٹ اخبارتازہ ترین - اے پی پی۔ 09 مئی2025ء) فلسطینی نائب صدر حسین الشیخ نے سعودی عرب کے ولی عہد اور وزیراعظم شہزادہ محمد بن سلمان سے ملاقات کی۔العربیہ کے مطابق اس اہم ملاقات میں فلسطین کی تازہ ترین صورتحال اور مظلوم فلسطینی عوام کے حقوق کے تحفظ پر تفصیلی تبادلہ خیال کیا گیا۔ریاض میں ہونے والی اس ملاقات کے دوران دونوں رہنماؤں نے مشترکہ طور پر مسئلہ فلسطین کی حمایت جاری رکھنے، سیاسی تعاون کو مضبوط بنانے اور عالمی سطح پر فلسطینی موقف کو مؤثر انداز میں اجاگر کرنے پر زور دیا۔

سعودی قیادت نے اس موقع پر فلسطینی عوام کے ناقابل تنسیخ حقوق کی مکمل حمایت کا اعادہ کیا اور اسرائیل کے مظالم کے خلاف مشترکہ سفارتی کوششیں تیز کرنے کی ضرورت پر زور دیا۔

(جاری ہے)

ولی عہد شہزادہ محمد بن سلمان نے باور کرایا کہ سعودی عرب فلسطینی عوام کے ساتھ ہمیشہ کھڑا رہا ہے اور آئندہ بھی ہر سطح پر ان کے حق خودارادیت اور ان کی آزاد ریاست کے قیام کی حمایت کرتا رہے گا۔فلسطینی نائب صدر نے غزہ کی پٹی اور فلسطین کی تازہ ترین صورت حال کے حوالے سے ولی عہد کو آگاہ کیا۔ انہوں نے سعودی قیادت کی تاریخی حمایت پر شکریہ ادا کرتے ہوئے کہا کہ مشکل ترین حالات میں بھی سعودی عرب نے فلسطینی کاز کو اولیت دی ہے۔ فلسطینی قوم سعودی عرب کی خدمات کو قدر کی نگاہ سے دیکھتے ہیں۔