بھارت ہماری امن کی خواہش کو کمزوری نہ سمجھے،رانا تنویر حسین

وفاقی وزیرسے سینیٹر پرویز رشید کی ملاقات ،پاکستان ، بھارت کے درمیان جاری کشیدگی پر تبادلہ خیال کیا

جمعہ 9 مئی 2025 13:30

اسلام آباد(اُردو پوائنٹ اخبارتازہ ترین - این این آئی۔ 09 مئی2025ء)وفاقی وزیر رانا تنویر حسین نے کہاہے کہ بھارت ہماری امن کی خواہش کو کمزوری نہ سمجھے۔تفصیلات کے مطابق وفاقی وزیر رانا تنویر حسین سے سینیٹر پرویز رشید نے ملاقات کی، ملاقات کے دوران پاکستان اور بھارت کے درمیان جاری کشیدگی پر تفصیلی تبادلہ خیال کیا گیا۔رانا تنویر حسین نے بھارت کے ہاتھوں مریدکے میں ایک مسجد پر حملے کی بزدلانہ کارروائی کی مذمت کی۔

انہوں نے کہا کہ پاکستان کی فوج نے فوری طور پر جوابی کارروائی کی اور دشمن کو منہ توڑ جواب دیا۔

(جاری ہے)

انہوں نے واضح کیا کہ اگر بھارت نے آئندہ کسی بھی چالاکی کا مظاہرہ کیا تو پاکستان اس کا جواب اس طرح دے گا کہ دنیا اسے یاد رکھے گی۔رانا تنویر حسین نے پاکستان کی مسلح افواج پر فخر کا اظہار کرتے ہوئے کہا کہ پاکستان کو اپنے دفاع کا پورا حق حاصل ہے اور وہ کسی بھی صورت میں اپنی سرحدوں کا تحفظ یقینی بنائے گا، اس مشکل وقت میں پوری قوم پاکستان کی فوج کے ساتھ کھڑی ہے اور سیاسی و فوجی قیادت ایک ہی صفحے پر ہے۔وفاقی وزیر نے واضح کیا کہ قومی دفاع پر کوئی سمجھوتہ نہیں کیا جائے گا اور سرحدوں کی حفاظت کے لئے ہر ممکن قدم اٹھایا جائے گا۔