راولپنڈی پولیس کے شہر بھر میں گرجا گھروں کی سکیورٹی کے لیے ڈیوٹی پر 450 افسران و جوان تعینات

اتوار 11 مئی 2025 15:50

راولپنڈی (اُردو پوائنٹ اخبارتازہ ترین - اے پی پی۔ 11 مئی2025ء) راولپنڈی پولیس نے شہر بھر میں گرجا گھروں کی سیکیورٹی کے لیے مؤثر اور جامع انتظامات کیے ہیں۔ ترجمان پولیس کے مطابق سیکیورٹی ڈیوٹی پر 450 سے زائد افسران و جوان تعینات کیے گئے ہیں جو اپنی ذمہ داریاں پوری مستعدی سے انجام دے رہے ہیں۔ سیکیورٹی کو یقینی بنانے کے لیے تھانوں کی موبائل گاڑیاں، ایلیٹ فورس اور ڈولفن فورس کی خصوصی ٹیمیں مسلسل گشت کر رہی ہیں۔

(جاری ہے)

اس دوران سینئر افسران موقع پر موجود عملے کو نہ صرف چیک کر رہے ہیں بلکہ ان کو ڈیوٹی کے حوالے سے ضروری ہدایات بھی فراہم کر رہے ہیں۔ سی پی او راولپنڈی سید خالد ہمدانی نے اس موقع پر کہا کہ شہریوں کی جان و مال کا تحفظ پولیس کی اولین ذمہ داری ہے اور اس مقصد کے حصول کے لیے تمام تر دستیاب وسائل بروئے کار لائے جا رہے ہیں۔ انہوں نے مزید کہا کہ شہر میں امن و امان کی فضا کو برقرار رکھنے کے لیے کوئی کسر نہیں چھوڑی جائے گی۔