سی ڈی اے نے جاری بارشوں کی ہنگامی صورت حال سے نمٹنے کے لیے اپنے تمام سب اسٹیشنز پر واقع فائر اینڈ ریسکیو یونٹس کو مکمل طور پر فعال کر دیا

اتوار 11 مئی 2025 23:50

اسلام آباد (اُردو پوائنٹ اخبارتازہ ترین - اے پی پی۔ 11 مئی2025ء) چیئرمین سی ڈی اے، چیف کمشنر اسلام آباد اور ڈائریکٹر جنرل سول ڈیفینس محمد علی رندھاوا کے ہدایات پر سی ڈی اے نے جاری بارشوں کی ہنگامی صورت حال سے نمٹنے کے لیے اپنے تمام سب اسٹیشنز پر واقع فائر اینڈ ریسکیو یونٹس کو مکمل طور پر فعال کر دیا ہے۔اتوار کو سی ڈی اے کی جانب سے جاری بیان کے مطابق ریسکیو ٹیمیں اسلام آباد کے مختلف علاقوں میں گشت کر رہی ہیں تاکہ چوکسی کو یقینی بنایا جا سکے، ناگہانی واقعات سے بروقت نمٹا جا سکےاور عوام کو فوری امداد فراہم کی جا سکے۔

اب تک کئی کامیاب آپریشنز انجام دیے جا چکے ہیں، جن میں آبپارہ کے قریب درخت گرنے کے واقعے سے متاثرہ افراد کو بچانے اور نشیبی علاقوں میں پانی جمع ہونے کے مسائل کو حل کرنا شامل ہے۔

(جاری ہے)

سی ڈی اے عوام کی سلامتی کو اولین ترجیح دیتا ہے اور شہریوں سے اپیل کرتا ہے کہ وہ کسی بھی ہنگامی صورت حال کی فوری اطلاع دیں تاکہ سی ڈی اے کے ایمرجنسی اور ڈیزاسٹر مینجمنٹ ونگ کی ریسکیو ٹیمیں بروقت کارروائی کر سکیں۔

مزید براں سیونتھ ایونیو پر ایک خاتون گاڑی چلاتے ہوئے غیر ارادی طور پر فٹ پاتھ پر آ گئیں۔ سی ڈی اے کی ریسکیو ٹیموں نےفوری طور مدد فراہم کرتے ہوئےان کی حفاظت کو یقینی بنایا اور ضروری امداد بھی فراہم کی۔ خوش قسمتی سے، بروقت کارروائی کی بدولت خاتون کو محفوظ بچا لیا گیا۔چیئرمین سی ڈی اے کا عزم ہے کہ شہریوں کی جان و مال کے تحفظ کے لیے ہر ممکن اقدامات بروئے کار لائے جائیں۔