اے این ایف کا بڑا کریک ڈائون، 16کروڑ 54لاکھ روپے سے زائد مالیت کی منشیات برآمد

ْ9مختلف کارروائیوں میں 14ملزمان کو گرفتار ،تعلیمی اداروں میں منشیات فراہمی کا بڑا نیٹ ورک بے نقاب

پیر 12 مئی 2025 12:37

لاہور (اُردو پوائنٹ اخبارتازہ ترین - این این آئی۔ 12 مئی2025ء) انسداد منشیات فورس (اے این ایف)نے تعلیمی اداروں سمیت مختلف شہروں میں منشیات اسمگلنگ کے خلاف بھرپور کریک ڈائون کیا، جس کے نتیجے میں 9مختلف کارروائیوں میں 14ملزمان کو گرفتار کیا گیا۔ان کارروائیوں کے دوران مجموعی طور پر 16کروڑ 54لاکھ روپے سے زائد مالیت کی منشیات برآمد کی گئیں۔ترجمان کے مطابق اے این ایف نے تعلیمی اداروں میں منشیات کی اسمگلنگ اور فروخت کے خلاف بھی خصوصی کارروائیاں کیں، اور ایک بڑے نیٹ ورک کو بے نقاب کیا۔

ڈی ایچ اے کراچی (چھوٹا بخاری)میں 2موٹر سائیکل سوار ملزمان سے 1کلو آئس برآمد کی گئی۔لاہور میں سرائے عالمگیر، منڈی بہاالدین روڈ پر یونیورسٹی کے قریب 3ملزمان سے 12کلو گرام چرس برآمد ہوئی، جو گاڑی میں مہارت سے چھپائی گئی تھی۔

(جاری ہے)

گرفتار ملزمان نے اعتراف کیا کہ وہ تعلیمی اداروں کے طلبا کو منشیات فروخت کر رہے تھے۔کاک پل ایکسپریس وے اسلام آباد کے قریب 4ملزمان سے 12کلو چرس برآمد کی گئی۔

آر سی ڈی روڈ حب میں مسافر بس سے 10.8 کلو چرس برآمد کی گئی، جس میں ایک خاتون بھی شامل تھی۔جنرل بس ٹرمینل پشاور کے قریب افغان باشندے سے 5کلو آئس برآمد ہوئی، جو پنچنگ پیڈز میں چھپائی گئی تھی۔شاہی قلعہ سرکلر روڈ لاہور کے قریب کارروائی کے دوران ملزمان سے 706گرام ایکسٹسی گولیاں اور 200گرام آئس برآمد کی گئی۔سارانان، ضلع پشین میں 1870کلو چرس برآمد کی گئی، جبکہ کچی آبادی، پرانا چمن میں 20کلو افیون برآمد ہوئی۔پرانا پسنی روڈ، کوہِ مراد، کیچ کے قریب جھاڑیوں میں 12کلو ہیروئن چھپائی گئی تھی، جسے برآمد کر لیا گیا۔اے این ایف کے مطابق انسداد منشیات کے حوالے سے دیگر اہم کارروائیاں ملک کے مختلف شہروں میں بھی جاری رہیں۔