پنجاب کے اسکولوں کیلئے موسم گرما کی تعطیلات کا شیڈول جاری

گرمی کی شدت میں غیر معمولی اضافہ ہونے کی صورت میں اسکولوں میں قبل از وقت تعطیلات دے دی جائیں گی

محمد علی منگل 13 مئی 2025 19:28

لاہور (اُردو پوائنٹ اخبارتازہ ترین۔ 13 مئی2025ء) پنجاب کے اسکولوں کیلئے موسم گرما کی تعطیلات کا شیڈول جاری، گرمی کی شدت میں غیر معمولی اضافہ ہونے کی صورت میں اسکولوں میں قبل از وقت تعطیلات دے دی جائیں گی۔ تفصیلات کے مطابق گرمی کی شدت میں اضافہ ہوتے ہی پنجاب کے تعلیمی اداروں خاص کر اسکولوں میں موسم گرما کی تعطیلات کی تیاریاں شروع کر دی گئی ہیں۔

پنجاب کے اسکولوں میں تعلیم حاصل کرنے والے بچوں کو اس مرتبہ زیادہ تعطیلات ملنے کا امکان ہے۔ میڈیا رپورٹس کے مطابق محکمہ اسکولز ایجوکیشن پنجاب نے موسم گرما کی تعطیلات کا شیڈول جاری کر دیا ہے، جاری کردہ شیڈول کے مطابق پنجاب میں اسکول یکم جون سے 9 اگست 2025 تک بند رہیں گے۔ محکمہ تعلیم پنجاب کے مطابق یہ فیصلہ بچوں، والدین اوراساتذہ کی صحت کو مدنظررکھتے ہوئے کیا گیا ہے تاکہ شدید گرمی کے موسم میں تعلیمی سرگرمیوں کے دوران کسی بھی قسم کی پریشانی یا بیماری سے بچا جا سکے۔

(جاری ہے)

محکمہ اسکولز ایجوکیشن نے موسم گرما کی قبل از وقت تعطیلات کا بھی عندیہ دیتے ہوئے کہا ہے کہ اگر درجہ حرارت میں غیرمعمولی اضافہ ہوا توموسم گرما کی تعطیلات ایک ہفتہ پہلے بھی شروع ہو سکتی ہیں۔ گرمی کی شدت میں غیر معمولی اضافہ ہونے کی صورت میں مئی کے آخری ہفتے میں موسم گرما کی تعطیلات کا آغاز ہو سکتا ہے۔ والدین اور اساتذہ سے اپیل کی گئی ہے کہ وہ حکومتی ہدایات پر عمل کرتے ہوئے بچوں کو شدید گرمی سے بچانے کے لیے احتیاطی تدابیراختیار کریں۔

یہاں واضح رہے کہ ماہرین موسمیات کی جانب سے آنے والے دنوں میں گرمی کی شدت میں مزید اضافے کا امکان ظاہر کیا جا رہا ہے۔ گرمی کی شدت میں غیر معمولی اضافہ ہونے پر تعلیمی اداروں کو جون سے قبل ہی بند کر دیے جانے کا امکان ہے۔ جبکہ گرمی کی غیر معمولی شدت کے امکان کے باعث تعلیمی اداروں میں سمر کیمپس کی اجازت بھی نہیں دی جائے گی ۔