ٹرمپ کا شاہی استقبال، جامنی ٹائی اور جامنی کارپٹ، خاتون اول میلانیا غیرحاضر

بدھ 14 مئی 2025 16:51

واشنگٹن (اُردو پوائنٹ اخبارتازہ ترین - این این آئی۔ 14 مئی2025ء)ریڈ کارپٹ دنیا بھر میں عزت، وقار اور خصوصی پروٹوکول کی علامت سمجھا جاتا ہے مگر دنیا کے طاقت ترین ملک امریکا کے صدر ڈونلڈ ٹرمپ کے لیے سعودی عرب میں جامنی کارپٹ بچھایا گیا۔میڈیارپورٹس کے مطابق ڈونلڈ ٹرمپ جب اپنے طیارے ایئر فورس ون سے باہر آئے تو سب کی نظریں ان پر مرکوز تھیں۔ جامنی ٹائی اور نیلے سوٹ میں ملبوس امریکی صدر کیلیے اس بار روایت سے ہٹ کر سعودی حکومت نے روایتی سرخ قالین کے بجائے جامنی قالین بچھادیا۔

(جاری ہے)

یہ ایک علامتی رنگ ہے جو سعودی عرب کے علاقے عیسر کے ثقافتی رنگوں کی نمائندگی کرتا ہے کیونکہ قدرتی پھولوں سے مالا مال عیسر میں جامنی رنگ کے پھول بہت کِھلتے ہیں۔مگر زمین پر بچھے جامنی کارپٹ سے پہلے امریکی صدر کو جہاز سے نیچے اترنے کیلیے جو ایئر کرافٹ سیڑھیاں لگائیں گئیں، ان پر بھی نیا جدید اور خوش رنگ جامنی کارپٹ خصوصی طور پر نصب کیا گیا تھا۔امریکی صدر ڈونلڈ ٹرمپ کا سعودی عرب میں استقبال کرنے کے منتظمین کے مطابق استقبال سفارتی طور پر بڑی باریکی سے ڈیزائن کیا گیا تھا تاکہ ٹرمپ کے ساتھ خاص تعلقات کو دنیا کے سامنے اجاگر کیا جا سکے۔